б д т: судандики зораванлиқниң милйонлиған кишини ачарчилиқ гирдабиға иттириш хәвпи бар
бирләшкән дөләтләр тәшкилати дунйа йемәк - ичмәк пирограммиси судандики зораванлиқ һәрикәтлириниң милйонлиған кишини ачарчилиққа гирдабиға иттириш хәвпиниң барлиқи тоғрилиқ агаһландурди.
түркийә авази радийоси хәвири: бирләшкән дөләтләр тәшкилати дунйа йемәк - ичмәк пирограммисиниң римдики баш оргини тәрипидин елан қилинған йазма байанатта, судан хәлқиниң үчтин бириниң нөвәттә йетәрлик йемәк - ичмәк тепиш мәсилисидә қийинчилиққа дуч келиватқанлиқи, тоқунушлар сәвәбидин б д т дунйа йемәк - ичмәк пирограммисиниң судандики паалийәтлирини тохтитишқа мәҗбур болғанлиқи әскәртилип мундақ дейилди: «судандики зораванлиқ һәрикәтлириниң милйонлиған кишини ачарчилиқ гирдабиға иттириш хәвпи бар.»
байанатта, бирләшкән дөләтләр тәшкилати дунйа йемәк - ичмәк пирограммисиниң 2023-йили судандики 7 милйон 600 миң адәмгә инсанпәрвәрлик йардәм беришни пиланлиғанлиқи, әмма давамлишиватқан тоқунушларниң б д т дунйа йемәк - ичмәк пирограммисиниң еһтийаҗлиқ кишиләргә йемәк – ичмәк йәткүзүп бериш, балиларни мәктәп тамақлири билән тәминләш вә озуқлуқ йетишмәсликкә қарши күришигә тосалғу болуватқанлиқи қәйт қилинди.
байанатта йәнә, судандики тоқунушларда б д т дунйа йемәк - ичмәк пирограммисиниң үч хадиминиң һайатидин айрилғанлиқи әскәртилип мундақ дейилди: «б д т дунйа йемәк - ичмәк пирограммиси тоқунушқа қатнишиватқан һәрқайси тәрәпләрни җиддий тәдбир қоллинип, инсанпәрвәрлик йардәм хадимлириниң бихәтәрликигә капаләтлик қилишқа, судандики инсанпәрвәрлик йардәм мал – мүлүклири вә муәссәсәлирини қоғдашқа чақириду. шундақла, барлиқ тәрәпләрни тоқунушқа хатимә берип, йемәк - ичмәк вә инсанпәрвәрлик йардәм буйумлириниң еһтийаҗлиқ кишиләргә давамлиқ йәткүзүп берилишигә капаләтлик қилиш келишими түзүшкә чақириду.»
игилинишчә , 4-айниң 15-күни әтигәндә суданниң пайтәхти хартум вә башқа шәһәрләрдә судан армийәси билән тез йардәм бериш қисимлири оттурисида йүз бәргән қораллиқ тоқунуш сәвәбидин һайатидин айрилғанларниң сани 300 гә йәткән.