б д т ниң пәләстин алаһидә доклатчиси исраилийәни ирқи қизғинчилиқ билән әйиблиди
бирләшкән дөләтләр тәшкилатиниң пәләстин алаһидә доклатчиси фирансиска албанисә исраилийәниң пәләстинликләргә қаратқан ирқий қирғинчилиқиниң һолокост (чоң қирғинчилиқ) қа охшишип кетидиғанлиқини ейтти.
түркийә авази радийоси хәвири: б д т ниң пәләстин алаһидә доклатчиси албанисә туниста өткүзүлгән мағреб - мәшриқ мунбири йиғинида сөз қилди.
албанисә исраилийәниң ғәззә райониға қаратқан һуҗумлирини «инсанпәрвәрлик вә демократик қиммәт қарашларға ашкара уруш елан қилғанлиқ» дәп баһалиди вә «һазир ғәззәдә йүз бериватқан ишларни қандақму көрмәскә салалаймиз? бу бир паҗиә» деди.
албанисә ғәззәдә йүз бериватқан кишилик һоқуқ дәпсәндичиликлиригә һәмминиң диққитини тартип, исраилийәниң ғәззәдә 15 миң кичик балини қошқанда, тәхминән 35 миң кишини өлтүргәнликини вә бу һуҗумлар арқилиқ өз нөвитидә йәнә ишғалийәт астидики шәрқий қуддус вә ғәрбий қирғақтики барлиқ пәләстинликләрдин интиқам елишни нишан қилғанлиқини уқтурди.
исраилийәниң һуҗумлирини тохтитиш үчүн хәлқара җамаәтчиликни һәрикәткә өтүшкә чақириқ қилған албанисә йәнә мундақ деди:
«қилчә иккиләнмәстин ейталаймәнки, ғәззәдә йүз бәргән ишлар уруш әмәс, бәлки бир ирқий қирғинчилиқтур. гәрчә ғәрб дөләтлири ирқий қирғинчилиқ дегән сөзни ишлитиштин һәр қанчә биарам болсиму, ғәззәдики ирқий қирғинчилиқ һолокост (чоң қирғинчилиқ) қа охшишип кетиду»
албанисә сөзидә йәнә, исраилийәниң ғәззәдики һуҗумлириға қарши өткүзүливатқан намайишлар үстидиму тохтилип: «дунйа миқйасида бу зулумни тохтитиш үчүн һәрикәткә өткән вә мәктәпләрдә намайиш қилиш арқилиқ һакимийәт системилирини тәвритиватқан оқуғучилар һәрикитини қоллишимиз лазим» деди.
