pakistanda imranxanni qolgha élish herikiti bir kün kéchiktürüldi
lahor aliy sot mehkimisi hökümet we xewpsizlik küchlirining etigiche (17-mart) imranxanni qolgha élish herikitini toxtitishi toghrisida qarar chiqardi.
türkiye awazi radiyosi xewiri: pakistanda lahor aliy sot mehkimisi özi üstidin échilghan sotqa qatnashmighanliqi sewebidin tutush qarari chiqirilghan sabiq bash ministir imranxanning qolgha élinishi üchün saqchi idarisi bashlighan heriketni yene bir kün kéchiktürüshni qarar qildi.
sot mehkimisi pakistan adalet herikiti partiyesining rehbiri imranxanning 19-martta lahorda ötküzidighan yighilishini emeldin qaldurdi. shundaqla hökümet we öktichi partiyelerdin mesilini muzakire arqiliq hel qilishni telep qildi.
islamabad sot mehkimisining sotchisi zafer iqbal sabiq bash ministir imranxan sotqa qatnashqan ehwalda tutush qararining toxtitip qoyulidighanliqini bildürdi.
tünügün (15-mart) lahor aliy sot mehkimisi saqchilarning imranxanni qolgha élish üchün bashlighan heriketni bügün shu yer waqti etigen saet 10.00 ghiche toxtitish toghrisida qarar chiqarghan idi.
imranxanning qollighuchiliri her éhtimalgha qarshi rehbirining lahordiki öyi etrapigha we yollargha kontéynér qoyup, qum xaltiliri bilen tosuqlarni hasil qilmaqta.
saqchilarning 14-mart imranxanni tutush üchün bashlighan herikitide, qollighuchilar bilen saqchilar otturisida sürkilishler yüz bérip, 60 tin artuq saqchi yarilandi, 15 namayishchi tutuldi. shundaq bolsimu, saqchilar imranxanni qolgha alalmidi.
