sholz: tinchliqning emelge éshishi üchü rusiye chékinishi kérek
gérmaniye bash ministiri olaf sholz rusiye bilen ukraina otturisidiki urushning axirliship, tinchliqning emelge éshishi üchün, rusiyening bu toghrida qedem tashlishi we eskerlirini chékindürüshi kéreklikini éytti.
türkiye awazi radiyosi xewiri: gérmaniye bash ministiri olaf sholz latwiye bash ministiri kriszhanis karins bilen körüshkendin kéyin, qoshma axbarat élan qilish yighini ötküzdi.
u körüshüshte natoning sherqiy qanitidiki xewpsizlik mesililirini muzakire qilghanliqlirini, hazirqi ehwalda yawropadiki ittipaqdashlar arisida qoyuq hemkarliq we birlikte heriket qilishning ehmiyetlik ikenlikini bildürdi.
u: «yawropa ittipaqi bilen natoda bir-birimizning bixeterlikige mesul bolimiz. bu sewebtin hemkarliqlirimizni kücheytish intayin muhim ehmiyetke ige» dédi.
u ukrainaning rusiyege qarshi qehrimanlarche we baturluq bilen küresh qiliwatqanliqini, muweppeqiyetke érishishi üchün yawropaning atlantik shérikliri bilen ukrainani qollaydighanliqini we bu yardemning uzunghiche dawam qilidighanliqini qayta tekitlidi.
u ukrainaning muzakirelerni qobul qilishi üchün qaysi qedemlerning tashlinishi kérekliki toghrisidiki soalgha, «rusiye ukrainagha hujum qildi. rusiye tinchliqning emelge éshishi üchün qedem tashlishi we bir ish qilishi kérek. muhim bolghini eskerlirini chékindürüsh» dep jawab berdi.
u nato zéminlirini qoghdashqa wede bérip: «biz hujumgha uchrisaq, natoning her bir kiwadrat métir zéminini qoghdaydighanliqimiz toghrisida ittipaqdash bolush süpitide ortaq pikir ige » dédi.
u buning balitiq döletliri we polshagha muhim signal ikenlikini qeyt qildi.
latwiye bash ministiri kriszhanis karins gérmaniyening ukrainani qollishining muhim ikenlikini eskertip: «latwiye nuqtisidin éytqanda, gérmaniyening qollishi ukrainaning mewjutluqi üchün halqiliq ehmiyetke ige» dédi.
u ukrainani qollashning dawamlishishi kéreklikini tekitlep: «amérika, gérmaniye, yawropa ittipaqi yaki natoda ukrainani dawamliq qollash iradiside héchqandaq boshash yoq» dédi.
