xitay «jasusluq shari» ning étip chüshürülgenlikige naraziliq bildürdi
xitay «istixbarat meqsetlik» dégen guman bilen amérikaning xitaygha tewe sharni étip chüshürüwetkenlikige naraziliq bildürdi.
türkiye awazi radiyosi xewiri: xitay tashqi ishlar ministirliqining bayanatida: «xitay amérikaning puqrawi uchquchisiz hawa aparatigha qoral ishletkenlikige ghezeplenmekte we hujumgha naraziliq bildüridu» déyildi.
xitayning bayanatida, washingiton dairilirige sharning puqrawi meqsetlik ikenliki, zorlash xaraktérlik sewebler bilen amérika hawa tewelikige kirip qalghanliqining pütünley tasadipiyliq ikenliki, mesilini temkin, kespiy shekilde we mötidilliq bilen hel qilinishining telep qilinghanliqini bildürüp: «amérika dölet mudapie ministirliqining bayanatchisi sharning yer yüzidiki xadimlargha herbiy yaki jismaniy tehdit élip kelmigenlikini éytti. shundaq ehwaldimu, amérika terep qoral ishlitishte ching turup, xelqara qaide – qanunlargha ochuq halda xilapliq qildi» déyildi.
bayanatta yene, xitayning weqede ziyangha uchrighan shirket we organlarning qanunluq heq-hoquqi we menpeetini qoghdaydighanliqi hemde kéreklik inkas qayturush hoquqini saqlap qalidighanliqi bildürüldi.
amérika dölet mudapie ministirliqi (besh burjeklik bina) 2 - féwralda xitaygha tewe yuqiri égizlik istixbarat sharining, amérika chong quruqluqida uchqanliqini we amérika armiyesining sharni közitiwatqanliqini élan qilghan idi.
xitay dairiliri sharning xitaygha tewe puqrawi hawa apparati ikenlikini, météorologiyelik tetqiqatqa ishlitilgenlikini, shamalning sörep kétishi sewebidin xata halda amérika hawa tewelikige kirip qalghanliqini bildürgen idi.
xitayning «jasusluq shari», amérika pirézidénti jo baydinning buyruqi bilen amérika chong quruqluqdin déngiz tewelikige ötkende, amérika armiyesige tewe urush ayropilanliri teripidin étip chüshürüldi.
