putin: yadro urushi tehditi künséri kücheymekte
rusiye pirézidénti wladimir putin yadro urushi tehditining küchiyiwatqanliqini tekitlep, «rusiye (yadro qorallirini) birinchi bolup ishletmeydu, eger birinchi bolup ishletmise, ikkinchisimu bolmaydu» dédi.
türkiye awazi radiyosi xewiri: rusiye pirézidénti putin ammiwiy teshkilatlar we kishilik hoquqni tereqqi qildurush kéngishi yighinida qilghan sözide, donbasta yashaydighan xelqlerning kishilik hoquqining 8 yil boyiche depsende qilinghanliqini we xelqaraliq teshkilatlarning buni körmeske sélip kelgenlikini bildürdi.
putin ukrainada qozghighan «alahide herbiy heriket» tin kéyin, birleshken döletler teshkilati kishilik hoquq kéngishi, yawropa kéngishi we bashqa kishilik hoquq teshkilatlirining oyghanghanliqini eskertip: «bularning hemmisi bu qurulmilarning qanunda belgilengen mejburiyetlirini ada qilalmaydighanliqini körsitip berdi. ashkara tenqidiy qarash sewebidin, rusiye bu teshkilatlardiki ezaliqigha xatime bérishke mejbur boldi» dédi.
putin gherb kishilik hoquq teshkilatlirining «rusiyeni mewjut bolup turush hoquqi héchbir shekilde bolmighan ikkinchi derijilik dölet qatarida körgenlikini» tekitlep, dölet menpeeti üchün her xil yol we wasitiler bilen küresh qilidighanliqlirini éytti.
u: «elwette, aldi bilen biz tinch yollargha ehmiyet bérimiz. emma, qilidighangha bashqa ish qalmighanda, andin qolimizdiki barliq amallar bilen özimizni qoghdaymiz» dédi.
u yene, yadro urushining mumkinchiliki heqqidimu toxtilip mundaq dédi:
«yadro urushining tehditi künséri kücheymekte. rusiye (yadro qorallirini) birinchi bolup ishletmeydu, eger birinchi bolup ishletmise, ikkinchisimu bolmaydu. chünki yadro qorallirini zéminimizgha qarshi ishlitish éhtimalliqi intayin cheklik.»
u axirida, yadro qorallirini ishlitish mumkinchiliki heqqide söz qilmighanliqini, peqet jawab süpitide bezi tedbirlerni yolgha qoyghanliqlirini uqturmaqchi bolghanliqini éytti.
