америка қитәләр ара башқурулидиған бомба синақ қилди

түркийә авази радийоси хәвири: америка һава армийә йәршари зәрбә бериш қоманданлиқ иштаби қитәләр ара башқурулидиған бомба синақ қилинғанлиқи тоғрисида байанат елан қилди.

байанатта: «мәзкур синақ, американиң йадро күчиниң бихәтәр, ишәнчлик, 21-әсирдики тәһдитләрни тосуш вә иттипақдашлиримизни хатирҗәм қилишта үнүмлүк икәнликини испатлашни мәқсәт қилған даимлиқ вә қәрәллик паалийәтләрниң бир қисми. бу хил синақлар илгири 300 қетимдин артуқ қилинған, бу синақ нөвәттики йәр шари тәрәққийатиниң нәтиҗиси әмәс» дейилди.

калифорнийәдики ванденберг (Vandenberg) аләм армийә базисидин қойуп берилгән, қоралсиз баллистик башқурулидиған бомба, 6760 километир мусапини бесип, маршал тақим араллиридики кваҗалин (Kwajalein) марҗан тақим арилидики нишанға дәл тәгди.

«Minuteman III» америка армийәсиниң истратегийәлик қорал-йарағ амбириниң ачқучи дәп қарилиду. башқурулидиған бомбиниң мусаписи 9660 километирдин ашиду, саәтлик тезлики тәхминән 24 миң километир.

генерал арманд воң (ArmandWong) байанатида: «бизниң синақлиримиз алдин пиланланған болуп, дунйадики тәрәққийатларға қаритилған инкас әмәс. һәр қетимлиқ қойуп беришниң инчикә пиланлаш җәрйани қойуп бериштин алтә айдин бир йил илгири башлиниду» деди.

америка мушу айниң (2022-йили авғуст) бешида, тәйвән әтрапидики маневирлар сәвәбидин хитай билән болған зиддийәтниң кәскинлишип кетишидин сақлиниш вә апрелда (2022) украинада давамлишиватқан урушта русийә билән болған йадро ихтилапини азайтиш үчүн мәзкур синақни икки қетим кечиктүргән иди.

русийә пирезиденти владимир путин февралда (2022) елан қилған байанатида, русийәниң йадро күчлириниң һошйарлиқни әң йуқири сәвийәгә чиқарған иди. шу сәвәбтин, русийәниң украинаға таҗавуз қилишиниң йадро урушини кәлтүрүп чиқириши мумкинликигә мунасивәтлик әндишәләр күчәйгән иди.

бирақ, америка һазирға қәдәр өзиниң йадро агаһландуруш дәриҗисини йуқири көтүрүш үчүн һечқандақ сәвәб йоқлуқини елан қилған ейтти.