пирезидент җо байдин билән ши җинпиң көрүшти

түркийә авази радийоси хәвири: америка пирезиденти җо байдин билән хитай рәиси ши җинпиң телефонда көрүшти. көрүшүш 2 саәт 17 минут давамлашти.

җо байдин пирезидент болған 2021-йили йанвардин буйан ши җинпиң билән 5-қетимлиқи болған бу қетимқи көрүшүштә, икки дөләт мунасивәтлири музакирә қилинди.

авам палатасиниң башлиқи нәнси пелосиниң тәйвәнгә қилидиған зийарити, йеқинда икки дөләт оттурисида җиддийлик пәйда қилған иди.

ақсарай дөләт бихәтәрлик кеңишиниң истратегийәлик учур-алақә директори җон кирби алдинқи күни елан қилған байанатида, пирезидент байдин билән шиниң көрүшүшидә, хитайниң тәйвәнгә қарши, шундақла һинди-тинч окйан районидики «урушқақ мәйдани», иқтисадий мунасивәттики җиддийчиликләр вә хитайниң 24-февралдин башлап давамлишиватқан украина-русийә урушиға тутқан позитсийәсиниң музакирә қилинидиғанлиқини билдүргән иди.

пирезидент җо байдинниң бир қарарға кәлмигәнлики елан қилинған болсиму, американиң хитайға қаратқан таможна баҗлирини әмәлдин қалдурулуп-қалдурмайдиғанлиқи мәсилисиниңму бу қетимқи көрүшүштә күнтәртипкә келидиғанлиқи тәхмин қилинмақта иди.

ши җинпиң америка пирезиденти җо байдинға тәйвән мәсилисигә чәт әлниң арилишишини қобул қилалмайдиғанлиқлирини тәкитләп: «от билән ойнашқанниң қоли көйиду» деди.

хитай таратқулиридики хәвәрләрдә билдүрүлишичә, ши җинпиң хитайниң тәйвән мустәқиллиқиға мунасивәтлик һәр қандақ һәрикәтләргә, шундақла һәр хил шәкил вә һәр түрлүк ташқи күчләрниң арилишишиға қарши чиқидиғанлиқини әскәрткән.

ши җинпиң: «хитай һөкүмити вә хәлқиниң тәйвән мәсилисидики мәйдани ениқ. игилик һоқуқи вә земин пүтүнлүкини қоғдаш, 1.4 милйардтин артуқ хитайлиқниң ирадиси. хәлқниң ирадисини айақ-асти қилишқа болмайду. от билән ойнашқанниң қоли көйиду» дегән.

хитай рәиси ши йәнә, америкаға «бир хитай» пиринсипиға вә америка-хитай мунасивәтлириниң асаси болған үч хитабнамәдә бәргән вәдисигә, һәрикити вә сөзи бирдәк һалда бойсунушни чақириқ қилған.

пирезидент байдин билән шиниң көрүшүши, америка авам палатасиниң башлиқи нәнси пелоси ханимниң хитай билән игилик һоқуқ ихтилапи болған тәйвәнни зийарәт қилидиғанлиқи тоғрисидики хәвәрләр елан қилинғандин кейин, мунасивәтләрдә йирикчилик техиму йуқири пәллигә чиққан бир пәйттә әмәлгә ашурулди.