dunya jamaetchiliki türkiyening ashliq kirizisini hel qilishta oynighan roligha yuqiri baha berdi

türkiye awazi radiyosi xewiri: türkiye, rusiye, ukraina we birleshken döletler teshkilati (b d t) ning alaqidar wekilliri tünügün istanbulda tarixiy ukraina ashliqini qara déngiz arqiliq dunya bazarlirigha yötkesh kélishimni imzalighandin kéyin, xelqara jemiyet arqa – arqidin bayanatlarni élan qilip, türkiye we jumhur reis rejep tayyip erdoghanning kirizisni hel qilishta oynighan roli we körsetken zor tirishchanliqigha yuqiri baha berdi.

shimaliy qibris türk jumhuriyiti jumhur reisi ersin tatar, kélishimning jumhur reis rejep tayyip erdoghanning zor tirishchanliqi, qeyserliki we iradisi netijiside hasil qilinghanliqini otturigha qoyup, «bu kélishim dunyadiki qiyinchiliqqa duch kelgen barliq döletler bilen zich munasiwetlik» dédi.

amérika tashqi ishlar ministiri antoniy blinkénmu yazma bayanat élan qilip, «amérika bu kélishimni qarshi alidu hemde b d t bash katipi antoniyo gutérrés bilen jumhur reis erdoghanning bu söhbetlerge muressechilik qilish yolida körsetken diplomatik tirishchanliqigha yuqiri baha béridu» dédi we sözini dawamlashturup, xelqara jemiyetning bu kélishimning ijra qilinishigha rusiyeni mesul qilishi, hemde rusiyening ukraina portlirini qamal qilishini axirlashturushi kéreklikini tekitlidi.

aqsaray dölet bixeterlik kéngishi istratégiyelik alaqe maslashturghuchisi jon kirbimu jumhur reis erdoghan we gutérrésning muresse qilish tirishchanliqigha minnetdarliq bildürdi.

yawropa ittipaqimu türkiyening bu jeryandiki muhim roligha yuqiri baha bérip, kélishimni tézdin ijra qilishqa chaqirdi؛ yawropa ittipaqining tashqi munasiwet we bixeterlik siyasiti boyiche aliy wekili josép borrél, kélishimning selbiy yönilishni özgertish üchün purset bilen teminligenlikini bildürdi.

rusiye tashqi ishlar ministiri sérgéy lawrow, jumhur reis erdoghanning kélishimning hasil qilinishigha qoshqan töhpisige rehmet éytti we kélishimning yer sharining yémeklik bixeterlikige kapaletlik qilidighanliqigha isharet qildi.

rusiye dölet mudapie ministiri sérgéy shoygu, özlirining kélishimni imzalash arqiliq mejburiyitini ada qilghanliqini éytti.

ukraina pirézidénti wiladimir zélénskiymu kélishim munasiwiti bilen jumhur reis rejep tayyip erdoghan we b d t bash katipi antonio gutérrésgha minnetdarliqini bildürdi.

italiye bash ministiri mariyo diragi, kélishimning yer shari ashliq kirizisini azaytishtiki muhim qedem ikenlikini otturigha qoydi.

buningdin bashqa albaniye bash ministiri edi rama, shiwétsiye tashqi ishlar ministiri en lindé, engliye tashqi ishlar ministiri liz trus, kuweyt tashqi ishlar ministirliqi, behreyin tashqi ishlar ministirliqi, afriqa elliri ittipaqi komitéti bashliqi musa faqi muhemmed qatarliqlarmu jumhur reis erdoghanning himayiside imzalanghan kélishimde türkiyening oynighan roligha yuqiri baha berdi.