ukrainagha qoshna besh dölet otturisida xitabname imzalandi

türkiye awazi radiyosi xewiri:  ukraina, polsha, éstoniye, litwaniye we latwiye qatarliq döletlerning otturisida ukraina paytexti kiyéw rayonidiki gostomél shehirige jaylashqan antonow ayrodurumida imza qoyush murasimi ötküzüldi.

murasimgha, ukraina ichki ishlar ministiri dénys monastirskiy, polsha ichki ishlar ministiri mariyusz kaminski, éstoniye ichki ishlar ministiri kristiyan yan, litwaniye ichki ishlar ministiri agné bilatayt we latwiye ichki ishlar ministiri mariya golubéwa qatarliqlar qatnashti.

ukraina ichki ishlar ministiri monastirskiy bayanat élan qilip, imzalanghan xitabnamening ehmiyiti üstide toxtaldi.

u: «mezkur xitabname rusiye eskerlirining ötküzgen urush jinayetlirini tekshürüsh, ména tazilash, chet ellerdiki ukrainaliq musapirlarni qoghdash, yaridar eskerlerni dawalash qatarliq témilarni öz ichige alidu» dédi.

u dunyadiki eng chong tiransiport ayropilani bolghan «225-antonow an mariya» ning parchiliri qoyulghan jayda ikenliklirini alahide eskertip: «bu yer men üchün éytqanda alahide ehmiyetke ige. chünki urush bashlinishtin ikki kün ilgiri bu ayrodurumda xizmet tekshürüshte bolghan idim. mariyani bizdin ayridi, emma ümidmizni hergizmu yoq qilalmaydu» dédi.

u ukraina ichki ishlar minstirliqigha qarashliq «insani ména tazilash xelqaraliq kordinatsiye merkizi» ning qurulghanliqini bildürdi.

polsha ichki ishlar ministiri kaminski ukraina xelqini qollaydighanliqlirini tekitlep: «rusiyening hujumi bashlanghandin tartip ukrainani qolliduq we kiyéw ghelbe qilghiche qollaymiz» dédi.

latwiye ichki ishlar ministiri golubéwa rusiyening ukrainaning sheherlirini yoq qilishqa urunuwatqanliqini éytti we: «rusiye kelgen jaylarda weyranchiliqlarni peyda qilip, puqralarni öltürüwatidu, ul-eslihelerni yoq qiliwatidu» dédi.

u ukrainaning démokratiye we erkinliki üchün küresh qilghanliqini bildürüp, ukraina xelqini qollashni dawamlashutridighanliqlirini qeyt qildi.

murasimdin kéyin, antonow ayrodurumida urushqa qatnashqan eskerler mukapatlandi.