столтенберг: йалтайтиш күчимиз вә мудапиәмизни күчәйтишимиз керәк

түркийә авази радийоси хәвири: шималий атлантик әһди тәшкилати — нато баш катипи йенс столтенберг, келәчикини мөлчәрлигили болмайдиған һазирқи дунйада, натониң йалтайтиш күчи вә мудапиә ишлирини күчәйтиши керәкликини оттуриға қойди.

столтенберг нато ташқи ишлар министирлири йиғини чақирилидиған латвийәниң пайтәхтидики рига бихәтәрлик мунбиридә «натониң 2030-йилиға илгириләш йолидики һалити» дегән темида нутуқ сөзлиди.

баш катип столтенберг, келәр йили испанийәдә чақирилидиған нато башлиқлар йиғинида мақуллинишни пиланлиниватқан «нато йеңи истратегийәлик чүшәнчиси» тоғрисида тохтилип, әң ахирқи истратегийәлик уқум һөҗҗитиниң 2010-йили португалийәниң пайтәхти лисбонда өткүзүлгән башлиқлар йиғинида мақулланғанлиқини, униңдин буйан дунйада нурғун өзгиришләрниң мәйданға кәлгәнликини ейтти.

«русийә билән хитай қаидиләрни асас қилидиған хәлқара тәртипкә бузғунчилиқ қилмақта, күч тәңпуңлуқи өзгәрмәктә. демократийә вә әркинлик еғир бесимға дуч кәлмәктә» дегән столтенберг, йеңи истратегийәлик уқум һөҗҗитиниң буларни өз ичигә алидиғанлиқиға ишарәт қилип өтти.

у сөзини давамлаштуруп, демократийәни күчәйтиш билән бир вақитта, һәрбий күчни күчәйтишниңму зөрүрлүкини, әң йеңи истратегийәлик уқум һөҗҗитидә, шималий атлантик окйанниң тинч дәп қарилидиғанлиқиниң оттуриға қойулғанлиқи, әмма һазир русийәниң таҗавузчилиқ позитсийәси билән хитайниң йәр шаридики тәсириниң күнсери күчийишидәк әһвалларниң мәвҗут икәнликини ейтти.

йенс столтенберг: «мөлчәрлигили болмайдиған һазирқидәк бир дунйада биз чоқум йалтайтиш күчимиз вә мудапиәмизни күчәйтишимиз керәк» деди.

натониң шималий америка вә йавропаниң иттипақи икәнликини тәкитлигән столтенберг, бу районниң йәр шари характерлик тәһдиткә дуч келиватқанлиқини, шуңа униң асийа-тинч окйан районидики шериклири вә йавропа иттипақи билән болған һәмкарлиқни күчәйтиши керәкликини оттуриға қойди.