taliban yawropadin yardem telep qildi

türkiye awazi radiyosi xewiri: hepte axiri qatar paytexti dohada yawropa ittipaqi bilen taliban hökümiti otturisida, insanperwerlikni asas qilghan halda ayrodurumlarni ochuq tutush, qizlarni oqutush qatarliq her xil mesililer boyiche uchrishish ötküzüldi.

ikki kün dawamlashqan uchrishishlarda, yawropa ittipaqi heyitige afghanistan alahide wekili tomas niklasson (TomasNiklasson), afghanistan heyitige taliban waqitliq hökümitining tashqi ishlar ministiri wekili emirxan mutteqiy bashchiliq qildi.

yawropa ittipaqining bayanatida, uchrishishlarning «yawropa ittipaqining waqitliq taliban hökümitini étirap qilghanliq menisini bildürmeydighanliqi» alahide tekitlendi.

bayanatta bildürülishiche, uchrishishlarda her ikki terep afghanistandiki ayrodurumlarning ochuq tutulushining ehmiyitini tekitligen. taliban waqitliq hökümiti ayrodurumlarni ochuq tutush üchün yawropa ittipaqidin yardem telep qilghan.

terepler yene, afghanistandiki barghanséri yamanlishiwatqan insaniy weziyet toghrisidiki endishelirini tilgha alghan. yawropa ittipaqi afghanistan xelqige insanperwerlik yardimi qilish könglini ipadiligen. afghanistan waqitliq hökümiti bolsa, dölet memurlirigha bir qanche aydin buyan bérilmigen maashlarni bérish wedisini xatiriletken.

yawropa ittipaqi insanperwerlik yardemlirige qoshumche qilip, xelqaraliq teshkilatlar we ijtimaiy teshkilatlarning wastisi arqiliq maarip we sehiye qatarliq sahelerde afghanistan xelqige biwaste köp miqdarda maliye yardimi qilish arzusini otturigha qoydi.

yawropa ittipaqining bayanatida, qiz we oghullarning xelqaraliq ölchemlerge uyghun oqutush pirogrammisi bilen barawer halda oqushini dawamlashturushining ahmiyiti tekitlendi.

bayanatta mundaq déyildi:

«yawropa ittipaqi heyiti afghanistan heyitining qiz-oghullarning barawer oqushi bilen ayallarni oxshimighan sahelerde xizmet qilish pursitige ige qilish niyitini memnunluq bilen qarshi aldi.»

afghanistanda chet el diplomatik organlirining bolushidin memnunluqini tilgha alghan afghanistan heyiti, yawropa ittipaqi diplomatlirining afghanistangha qaytishini qizghin qarshi alidighanliqlirini eskertti.

yawropa ittipaqi paytext kabulda belgilengen sanda diplomatik organlarni turghuzush éhtimalidin bésharet berdi. emma, buning talibanni étirap qilish menisini bildürmeydighanliqini we bixeterlik ehwaligha qarita qarar qilinidighanliqini eskertti.