yawropa wuxen wirusining tötinchi dolqunidin endishe qilmaqta

türkiye awazi radiyosi xewiri: yawropa döletliri wuxen wirusida tötinchi dolqungha teyyarliq qilish üchün heriketke ötti. délta gérmaniyede éghir xewp peyda qilghan wariyantqa aylandi.

robért koch uniwérstétining yéqinqi künlerde élan qilghan doklatida bildürülüshiche, wuxen wirusigha munasiwetlik weqelerde délta wariyantining nisbiti %37 tin %59 ke örligen.

iyun éyi (2021) ning béshidin tartip her hepte hessilep köpiyiwatqan délta wariyanti, gérmaniyede wuxen wirusigha munasiwetlik weqelerning üchtin ikki qismini teshkil qilghan.

firansiyede délta wariyantining wuxen wirusigha munasiwetlik nisbiti %40 ke yetken.

firansiye hökümiti: «délta wariyanti yazliq dem élishlargha qalaymiqanchiliq peyda qilishi mumkin. tötinchi dolqun xewpi éghir, weziyet téz sürette yamanlishiwatidu» dep agahlandurush élan qildi.

firansiyede düshenbe küni (12-iyul) yéngi qararlarning chiqirilishi perez qiliniwatqan bolup, waksina emletmigenlerge cheklime qoyush we bezi xizmet kesiplerde waksina emlitishni mejburiy qilish muzakire qilinmaqta.

ispaniyede yéqinqi töt künde wuxen wirusigha munasiwetlik weqeler 32 minggha chiqti. üsti yépiq kéchilik kulublar we bashqa köngül échish orunliri hepte axiridin bashlap taqilidu.

üsti ochuq jaylarda ötküzülgen paaliyetlerge qatnishi üchün salametlik tekshürüshining menpiy netijisini körsitishi yaki waksina emletken bolushi kérek.

délta wariyantining tesiride wuxen wirusigha munasiwetlik kündilik weqeler sani 2 mingdin ashqan portugaliyede, kéler hepte weqelerning ikki hesse köpiyishi texmin qilindi.

norwégiyemu yawropa körülüsh éhtimali bolghan tötinchi dolqundin endishe qiliwatqan döletlerning biri.

cheklimilerni iyul éyida emeldin qaldurush muzakire qiliniwatqan norwégiyede eng axirqi qarar awghust éyida chiqirilidu.