йавропа иттипақи ваксина бәлгилимилирини қанунлаштурди
йавропа иттипақи идарә-органлири иттипақ чегралири ичидики сайаһәтләрдә ишлитилидиған вухән вируси (Kovid-19) ваксинаси гуаһнамисиға мунасивәтлик бәлгилимиләрни қанунлаштурди.
түркийә авази радийоси хәвири: йавропа парламентида йавропа иттипақи диҗитал вухән вируси ваксинаси гуаһнамисиниң қанунлишиши мунасивити билән өткүзүлгән имза мурасимиға, йавропа иттипақи комитетиниң башлиқи урсула фондерлейен, йавропа парламентиниң башлиқи давид сассоли (David Sassoli) вә йавропа иттипақиниң нөвәтчи рәис дөлити португалийәниң баш министири антонийо коста (Antonio Costa) қатнашти.
йавропа иттипақи комитетиниң башлиқи урсула фондерлейен мурасимдин кейин өткүзүлгән ахбарат елан қилиш йиғинида, вухән вируси ваксинаси гуаһнамиси бәлгилимирини қанунлаштуруш ишлириниң ахирлашқанлиқидин мәмнун болғанлиқини билдүрди.
ваксина гуаһнамиси һәқсиз болуп, қәғәз йаки диҗитал шәкилдә тәййарлиниду. айримичилиқниң алдини елиш мәқситидә, ваксина әмләтмигән кишиләрму гуаһнамә алалайду.
ваксина гуаһнамиси кишиләрниң вухән вируси ваксинаси әмләткән-әмләтмигәнликини, әмләткән болса қәйәрдә вә қайси ваксинани әмләткәнликини билдүридиған мәлуматларни, вухән вируси билән йуқумланғанларниң саламәтликиниң йахшиланғанлиқини, антитела сәвийәсигә мунасивәтлик учурларни вә вухән вируси тәкшүрүш нәтиҗисини өз ичигә алиду.
гуаһнамә билән, йавропа иттипақида тәстиқланған вухән вируси ваксинаси әмләткән вә иккинчи қетимлиқ ваксина әмлинип аридин икки һәптә өткән кишиләр, сайаһәт җәрйанида қошумчә саламәтлик тәкшүрүшидин өтмәйду йаки карантин қилинмайду. хәлқ саламәтликини қоғдашқа мунасивәтлик зөрүр әһвалларда, дөләтләр өз алдиға қошумчә тәдбирләрни йолға қойалайду.
ваксина гуаһнамиси барлиқ йавропа иттипақи дөләтлири вә исландийә, личтенштейн, норвегийә, шивейтсарийә қатарлиқ дөләтләрдиму күчкә игә болиду.
ваксина гуаһнамиси йавропа иттипақи пуқралириға, қайси дөләт пуқраси болуштин қәтийнәзәр аилилиригә, йавропа иттипақида йашаватқан, әмма йавропа иттипақи пуқраси болмиған кишиләр билән башқа йавропа иттипақи дөләтлиридә сайаһәт қилиш һоқуқиға игә кишиләргә берилиду.
йавропа иттипақи һазирчә бийонтек-файзер, модерна, астразенека, җонсон вә җонсон ширкәтлириниң ваксиналирини тәстиқлиди.
