رۇھانى: دۇنيا بىلەن مۇناسىۋەت ئورناتماي تۇرۇپ تەرەققىي قىلغىلى بولمايدۇ

تۈركىيە ئاۋازى رادىيوسى خەۋىرى: ئىران پىرېزىدېنتلىق مەھكىمىسى بايانات ئېلان قىلىپ، پايتەخت تېھراندا ئىقتىسادشۇناسلار بىلەن كۆرۈشكەن رۇھانىنىڭ: «بىزمۇ مەسىلىلەرنىڭ دۆلەت ئىچىدە ھەل قىلىنىشى كېرەكلىكىگە ئىشىنىمىز، ئەمما شۇنى بىلىش كېرەككى، دۇنيا بىلەن مۇناسىۋەت ئورناتماي تۇرۇپ، ئىلگىرىلەشنى قولغا كەلتۈرگىلى، دۆلەتنى تەرەققىي قىلدۇرغىلى بولمايدۇ» دېگەنلىكىنى بىلدۈردى.

باياناتتا، رۇھانىنىڭ، ئىلگىرى 119 مىليارد دوللارغا يەتكەن نېفىت كىرىمىنىڭ ئۆزى ھۆكۈمەت باشقۇرغان مەزگىلدە 67 مىليارد دوللاردىن ئاشمىغانلىقىنى قەيت قىلغانلىقىغا دائىر ئۇچۇرلارغىمۇ ئورۇن بېرىلدى.

باياناتتا كۆرسىتىلىشىچە، ھەسەن رۇھانى يەنە، ئاۋسترىيەنىڭ پايتەختى ۋىيېننادا ئېلىپ بېرىلىۋاتقان يادرو كېلىشىمى سۆھبىتى توغرىسىدا توختىلىپ: «ۋىيېننادىكى سۆھبەت ئىراننىڭ كۈچىنىڭ نامايەندىسى. بۈگۈن دۇنيا ئىران بىلەن كېلىشىم تۈزۈش ۋە جازانى بىكار قىلىشتىن باشقا يولنىڭ يوقلۇقىنى قوبۇل قىلدى. بۇ ئىران ئۈچۈن زور ئۇتۇقتۇر» دېگەنلەرنى سۆزلىرىگە ئىلاۋە قىلغان.