تۈرك – ئامېرىكان سودا – سانائەتچىلىرى بايدىننى تۈرك دۇنياسىنىڭ سەزگۈرلۈكىنى نەزەردە تۇتۇشقا چاقىردى

تۈركىيە ئاۋازى رادىيوسى خەۋىرى: تۈرك – ئامېرىكان سودا – سانائەتچىلەر جەمئىيىتى بايانات ئېلان قىلىپ، تۈركىيە بىلەن ئامېرىكانىڭ ئىستراتېگىيەلىك ھەمكارلىقىنىڭ رايون ۋە دۇنيادىكى مۇھىم تەڭپۇڭلۇق ئامىلى ئىكەنلىكىگە ئىشارەت قىلغان ھالدا: «1915- يىلى يۈز بەرگەن كۆڭۈلسىز ۋەقەلەرنى، ئەينى دەۋرنىڭ شارائىتىغا ئاساسەن مۇھاكىمە قىلىشنى قايرىپ قويۇپ، ئۇنى تۈركىيەگە بېسىم ئىشلىتىش ۋاسىتىسىغا ئايلاندۇرۇش ئۇرۇنۇشلىرى ئىجابىي مۇناسىۋەتلىرىمىزگە كۆلەڭگە چۈشۈرمەكتە» دېگەنلەرنى قەيت قىلدى.

باياناتتا: «بىز ھاكىمىيەت بېشىغا چىققان كۈندىن باشلاپ دۇنيا بىلەن بەرپاچى ئالاقە ئورنىتىشقا تىرىشىۋاتقان ئامېرىكا پىرېزىدېنتى جو بايدىن ۋە ئۇنىڭ ھۆكۈمىتىنىڭ، 1915 – يىل ۋەقەلىرى توغرىسىدا تۈرك دۇنياسىنىڭمۇ سەزگۈرلۈكىنى ئويلاشقان ھالدا ئاقىلانە پوزىتسىيە بىلدۈرۈشىنى ئۈمىد قىلىمىز» دېگەن ئىبارىلەرگە ئورۇن بېرىلدى.

باياناتتا يەنە، تۈرك – ئامېرىكان سودا – سانائەتچىلەر جەمئىيىتىنىڭ پەقەت تۈرك سودا – سانائەتچىلىرىنىڭ ئامېرىكادىكى مەۋجۇتلۇقى ئەمەس، ئامېرىكا سودا دۇنياسىنىڭ تۈركىيەدىكى مەۋجۇتلۇقىنىڭ داۋاملىشىشى ۋە گۈللىنىشى جەھەتتىمۇ مەسئۇلىيەتنى ئۈستىگە ئېلىپ كېلىۋاتقانلىقى ئەسكەرتىلىپ: «تۈركىيە بىلەن ئامېرىكانىڭ ئىستراتېگىيەلىك ھەمكارلىق سەۋىيەسىدىكى سودا مۇناسىۋىتىنىڭ تەرەققىي قىلدۇرۇلۇشىنى، تارىخچىلار بەس – مۇنازىرە قىلىشى كېرەك بولغان مەسىلىلەرنىڭ ئىككى دوست دۆلەتنىڭ سىياسىي، سودا ۋە ھەممىدىن مۇھىمى دوستلۇق مۇناسىۋىتىمىزگە پاسسىپ تەسىر كۆرسىتىدىغان بىر رېتورىك قوللىنىلماسلىقىنى ئۈمىد قىلىمىز» دېيىلدى.