تەيۋەندىكى پويىز ۋەقەسىدە قازا قىلغانلار سانى 51 گە يەتتى

تۈركىيە ئاۋازى رادىيوسى خەۋىرى: تەيۋەن مەھەللىي تاراتقۇلىرىنىڭ تەيۋەن قاتناش مىنىستىرلىقىنى مەنبە قىلغان خەۋەرلىرىگە قارىغاندا، تەخمىنەن 350 يولۇچى ئولتۇرغان 8 ۋاگونلىق پويىز خۇالىيەن رايونىغا كىرىدىغان تونېلدا رېلىستىن چىقىپ كېتىپ، 51 ئادەم قازا قىلغان، 146 ئادەم يارىلانغان.

پويىزنىڭ 4 - ۋە 5 - ۋاگونلىرى ئېغىر زىيانغا ئۇچرىغان، ۋەقە يۈز بەرگەن جايغا ئوت ئۆچۈرۈش ۋە ئىزدەش - قۇتقۇزۇش ئەترەتلىرى ئەۋەتىلگەن.

تەيۋەن رەھبىرى سەي يىڭۋېن، مۇناسىۋەتلىك مىنىستىرلىق ۋە ئورۇنلاردىن ۋەقەگە ئالاقىدار زۆرۈر خىزمەتلەرنى باشلاشنى تەلەپ قىلغان.