awstriye asasiy qanun sot mehkimisi yaghliq artish cheklimisini bikar qildi
awstriye asasiy qanun sot mehkimisi, bashlanghuch mekteplerde yaghliq artishni cheklesh asasiy qanungha xilap dep höküm chiqardi.
türkiye awazi radiyosi xewiri: sot mehkimisi 2019 - yili mayda bash ministir sébastiyan kurz bashchiliqidiki ongchil hökümet teripidin parlaméntta maqullanghan bashlanghuch mekteplerde yaghliq artishni cheklesh qanunining asasiy qanungha xilap ikenlikige höküm qildi.
awstriye asasiy qanun sot mehkimisi bashliqi kiristof grabénwartér muxbirlarni kütüwélish yighinidiki sözide, sot mehkimisining, bashlanghuch mekteplerde bashni pütünley diniy kiyim - kéchek yaki simwolluq nersiler bilen yögeshni chekleydighan— xelq arisida «yaghliq artishni cheklesh qanuni» dep atiliwatqan qanun toghrisidiki hökümini élan qildi.
grabénwartér, ashqun ongchil hökümetning 2019 – yili ijra qilishqa bashlighan bashlanghuch mekteplerdiki yaghliq artish cheklimisining barawerlik pirinsipigha zitliqi sewebidin bikar qilinishigha höküm qilinghanliqini éytti.
u, maarip sistémisida peqet musulmanlarning diniy kiyimlirinila chekleshning bu guruppining jemiyette kemsitilishini keltürüp chiqiridighanliqini éytti.
u sözini dawamlashturup, asasiy qanun sot mehkimisining, hökümetning ilgiri sürginining eksiche mekteplerde diniy kiyim kiyish maarip sistémisida héchqandaq toqunush peyda qilmaydu, dep qaraydighanliqini, shundaqla her xil dinlar we dunya qarashlar arisida peqet islam dinigha mensup bolghan kiyim - kéchekning cheklinishining maarip qanunigha xilap höküm qilghanliqini qeyt qildi.
asasiy qanun sot mehkimisi bashliqi yene: «yighinchaqlighanda, cheklime maarip qanunining 43 - tarmiqida körsitilgen barawerlik, pikir erkinliki, dunya qarash we din erkinliki pirinsipigha xilap» dédi.
awstriye asasiy qanun sot mehkimisining bashlanghuch mekteplerde yaghliq artishni chekleydighan qanunning asasiy qanungha xilap ikenliki toghrisidiki qarari jemiyetning herqaysi qatlamliri, bolupmu musulmanlarning qizghin qarshi élishigha érishti.
awstriyede texminen bir yildin buyan bashlanghuch mekteplerde ijra qiliniwatqan yaghliq artishni cheklesh qanuni asasiy qanun sot mehkimisi ezalirining ortaq qarari bilen asasiy qanungha xilap dep qarilip, bikar qilindi.
