amérikaning herbiy we kongre ezaliri pakistanni ziyaret qilmaqta

türkiye awazi radiyosi xewiri: pakistan armiyesining bayanatigha asaslanghanda, amérika merkizi qomandanliq ishtabi (CENTCOM) ning qomandani joséf wotél we hemrahliqidiki heyet, pakistanning rawalpindi shehiridiki quruqluq armiye ishtabida pakistan armiyesining mesulliri bilen körüshken. körüshüshte, ikki dölet otturisidiki munasiwetler, géo istratégiyelik mesililer we rayonluq xewpsizlik mesililiri muzakire qilinghan.

körüshüsh jeryanida, pakistan quruqluq armiye qomandani kamar jawid bajwaning, «afghanistanning tinchliqi rayon üchün hayatiy ehmiyetke ige. pakistan armiyesi rayonda tinchliqni emelge ashurush üchün qolidin kélidighan barliq tirishchanliqlarni körsitidu» dégenliki bildürüldi.

amérika kéngesh palatasining ezasi lindséy grahammu pakistanni ziyaret qildi. pakistan tashqi ishlar ministirliqi amérika kéngesh palata ezasi grahamning bash ministir imran xan we tashqi ishlar ministiri shah mehmut kureshi bilen körüshkenliki toghrisida yazma bayanat élan qildi.

bayanatta bildürülishiche, körüshüshte, pakistanning afghanistanda tinchliqni emelge ashurush üchün basqan qedemliri, keshmirning ehwali we hindistan bilen bolghan munasiwetler toghrisida grahamgha melumat bérilgen.

graham afghanistan mesiliside bésilghan qedemler sewebidin pakistanni tebrikligen we bu mesilining tramp hökümitiningmu aldin ehmiyet béridighan mesililiri qataridin orun alidighanliqini bildürgen.

amérika merkiziy qomandanliq ishtabi bashliqi wotél we kéngesh palata ezasi grahamning pakistan ziyariti, ötken hepte ichide amérikadin pakistangha qilinghan üchinchi ziyaret bolup hésablinidu. amérikaning afghanistan alahide wekili zalmay xalilzad bulardin burun pakistangha yétip kelgen idi. u séntebir éyidin buyan pakistangha besh qétim bardi we bu qétimqi ikki künlük ziyaritini uzartip, uchrishishlirini dawam qilmaqta.