әрмән қарар лаһийәси түркийәниңла әмәс германларниңму наразилиқиға учриди
аталмиш 1915 – йил вәқәлиригә мунасивәтлик әрмән дәвалириға даир қарар лайиһәсиниң германийә федератип мәҗлисидә қобул қилинишиға болған наразилиқлар давамлашмақта.
түркийә авази радийоси хәвири: германийәниң қарариға йалғуз түркийәла әмәс, германийәниң ичидинму наразилиқлар билдүрүлмәктә؛ бу қатарда германийәниң даңлиқ һәптилик хәвәрләр журнили ‹стерн›му наразилиқ билдүрди... ханс улрих йаргисниң журналда елан қилинған мақалисидә, германийә федератип мәҗлисиниң қарари қаттиқ тәнқид қилинди.
йаргис мақалисидә, «бизниң өтмүшимиздә наһайити еғир бир қирғинчлиқ бар. биз буни қобул қилмаймиз. шуңа, биз башқа милләтләрниң өтмүши тоғрисида қарар чиқармаслиқимиз лазим» дегән ибариләрни ишләтти. мақалидә, қарарниң түркийәниң германийә вә әрменийә билән болған мунасивәтлиригә сәлбий тәсир көрситидиғанлиқи алаһидә тәкитләнди.
йаргис мақалисидә, «бу қарар билән бирликтә түрк – герман мунасивәтлиригә наһайити еғир зийан йәткүзидиған бир әһвал шәкилләнди. бу қарарни чиқарғучилар түркләр билән әрмәнләр арисидики мунасивәтләрдә йеқинлишиш көрүлидиғанлиқини илгири сүрмәктә. лекин, дәл әксичә икки дөләт арисидики мунасивәтләр техиму чигишлишип кетиду» дегәнләрни қәйт қилди.
