әнқәрә тошқини

бүгүнки күндә нурғун дөләтләрдә йетиштүрүлидиған «ангора тошқини» ниң әнқәрәдин дунйаниң һәрқайси җайлириға тарқалғанлиқини биләмсиз?

дунйада «ангора тошқини»  дәп атилидиған әнқәрә тошқини, йумшақ вә узун йуңлуқ тошқандур. бу тошқанниң келип чиқиш мәнбәси түркийәниң пайтәхти әнқәрә  болуп , бу йәрдин дунйаниң һәрқайси җайлириға тарқалған.

тарихий мәнбәләргә қариғанда, әнқәрә тошқининиң нәсли 1723-йили түркийәдә түгәп кәткән. охшаш мәзгилдә, йавропадики фирансийә ақсөңәклири ичидә әң алқишқа еришкән әрмәк һайван әнқәрә тошқини иди. бу тошқан 1900-йилларниң башлирида америкада тонулған. аридин қанчә әсирләр өткәндин кейин, германийәдә йашайдиған бир түркийә пуқраси тәрипидин түркийәгә қайтуруп келингән әнқәрә тошқини, ана йуртиниң муһитиға асанла маслишиду.  шуниң билән, бу тошқан қайта йетиштүрүлүшкә башлиниду.

әнқәрә тошқини асаслиқи йуңи, андин гөши вә териси үчүн беқилиду. йуң ишләпчиқириш үчүн йетиштүрүлидиған бирдинбир тошқан нәсли әнқәрә тошқинидур. һәр бир тошқан оттура һесаб билән йилиға бир килогирам йуң ишләпчиқириду. әнқәрә тошқини интайин йеник,  йуңи интайин йумшақ, йуңиниң изолйатсийәлик хусусийити йуқири болуп, йуқири иссиқлиқни сақлайду. бу хусусийәтлири түпәйли, бу тошқанниң йуңи көпинчә рәхт, доппа, попайка, әдийал, бовақлар кийимлири вә қар тейилиш кийимлирини ишләпчиқиришта ишлитилиду. електир магнитлиқ хусусийити түпәйли, рематизм бимарлири үчүн ишләпчиқирилиған алаһидә кийимләрниңму асаслиқ материйали һесаблиниду. у йәнә аваз долқунини өткөзмәйдиғанлиқи үчүн, авийатсийә вә аләм қатниши санаитидиму ишлитилиду. әнқәрә тошқининиң алтун қиммитидики йуңи қой йуңиға қариғанда сәккиз һәссә иссиқлиқ бериду вә сәзгүрлүк пәйда қилмайду.

дунйада 10 миң тонниға йеқин тошқан йуңи ишләпчиқирилиду. толиму әпсуски, бүгүнки күндә, әнқәрә тошқини йуңиниң асаслиқ мәнбәси,  униң ана йурти түркийә әмәс , бәлки дунйа бойичә % 90  тошқан йуңи ишләпчиқирилидиған хитайдур. дунйа бойичә җәнубий америка, авистиралийә вә йавропадиму йетиштүрүлидиған, сани нәччә милйонға йетидиған әнқәрә тошқини, ана йуртидики пәқәт бир қанчә деһқанчилиқ мәйданидила беқилиду.