پاکستان کا پاسپورٹ صومالیہ،شمالی کوریا اور یمن سے بھی نیچے آگیا

پاسپورٹ کی درجہ بندی جاری کرنے والی تنظیم ہینلے اینڈ پارٹنرز نے 2022 کے لیے ہینلے پاسپورٹ انڈیکس جاری کردیا جس میں جاپان اور سنگاپور ایک بار پھر دنیا کے طاقتور ترین پاسپورٹ قرار پائے ہیں۔

جاپان اور سنگاپور کا پاسپورٹ رکھنے والے شہری بغیر ویزا کے 192 ممالک کا سفر کر سکتے ہیں جب کہ طاقتور ترین پاسپورٹ میں جرمنی اور جنوبی کوریا دوسرے نمبر پر ہیں اور وہاں کے شہری 190 ممالک کا سفر بغیر ویزا کے کر سکتے ہیں۔

انڈیکس میں پاکستان  شمالی کوریا، صومالیہ اور یمن سے بھی نیچے 108ویں نمبر ہے جبکہ پاکستان کے شہری صرف 31 ممالک میں ویزا فری سفر کر سکتے ہیں،   درجہ بندی میں شمالی کوریا کا پاسپورٹ 104 ویں، صومالیہ کا 106 ویں اور یمن کا 107 ویں نمبر پر ہے،  پاکستان کے بعد شام 109، عراق 110 اور افغانستان 111 ویں نمبر پر ہے۔

بھارتی پاسپورٹ 83 ویں پوزیشن پر ہے اور  بھارت کے شہری 60 ممالک کا ویزا فری سفر کرسکتے ہیں۔

یہ درجہ بندی ہر سال کے شروع میں جاری کی جاتی ہے اور اس کے بعد اسے ہر 3 ماہ بعد اپ ڈیٹ کیا جاتا ہے۔