Президент Эрдоган Венгриядан кайтып келе жатканда учакта билдирүүлөрдү жасады
Эрдоган, Венгрияга сапары учурунда Газада туруктуу ок атышпоонун түзүлүшү жана гуманитардык жардамдардын агымынын камсыздалышы үчүн эмнелер жасала аларын сүйлөшүшкөнүн айтты.
Президент Режеп Таййип Эрдоган, Америка Кошмо Штаттарынын (АКШ) дүйнөнүн төрт тарабынан жаңырган «Газада ок атышпоо» чакырыктарына кулак салбоону эми токтотуусу керектигин айтты.
Президент Эрдоган Венгрия сапарынан кайтып келе жатканда учакта билдирүүлөрдү жасады.
Бардык жолугушууларда Газада 7-октябрдан бери уланып жаткан гуманитардык трагедияга өзгөчө көңүл бурганын баса белгилеген Эрдоган, Венгрияга сапары учурунда да туруктуу ок атышпоонун түзүлүшү жана гуманитардык жардамдардын агымынын камсыздалышы үчүн эмнелер жасала аларын сүйлөшүшкөнүн айтты.
Израилдин кыргындары уланып жатканда дүйнө жүзү боюнча Газада ок атышпоо чакырыктарынын күчөгөнүнө көңүл бурган Эрдоган: «АКШ эми бул чакырыктарга кулак салбоону токтотушу керек. Израиль палестиналыктарга жана Газага гана эмес, адамзатка да кол салууда. Тарых унчукпай тургандарды жоопко тартат жана айыптайт»,-деди.
Кызматын таштап кетсе деле Израилдин премьер-министри Биньямин Нетаньяхуну куткара албай турганын билдирген Эрдоган: «Алардын жоопко тартылышы үчүн мыйзамдуу негизде иш жүргүзөбүз. Нетаньяху эле эмес, бул геноцидди колдогондордун баары мыйзам алдында кылган согуш кылмыштары үчүн жооп беришет»,-деди.
Израилде да Нетаньяху башкаруусуна каршы күчтүү үндөр чыга баштаганын баса белгилеген Эрдоган, Израилдин барымтадагыларды өлтүрүшүнүн реакциянын дозасын арттырганын айтты.
Орусия-Украина кризисинде болсо дан коридорунун кайра иштетилиши керектигине басым жасаган Эрдоган:
«Жакында Орусиянын президенти Владимир Путин менен жолугуп, "Келгиле, дан коридорун иштетүү үчүн колдон келгендин баарын жасайлы" деп айтабыз. Андан оң жооп алуу менен жолубузду улантабыз деп үмүттөнөбүз»,-деди.
