Хакан Фидандын телефондук сүйлөшүүлөрү

Тышкы иштер министри Хакан Фидан АКШнын мамлекеттик катчысы Энтони Блинкен менен телефон аркылуу Швециянын НАТОго мүчөлүгү, Түркия-Армения жана Азербайжан-Армениянын нормалдашуу процесстери, F-16 согуштук учактарын сатып алуу жана модернизациялоо, ошондой эле Украина дан келишимин талкуулады.

Тышкы иштер министрлигинен алынган маалыматка караганда, Хакан Фидан менен Энтони Блинкен телефондук сүйлөшүү өткөрүштү.

Блинкен президент Режеп Таййип Эрдоган жарыялаган жаңы кабинетте тышкы иштер министри болуп дайындалган Хакан Фиданды куттуктады.

Сүйлөшүүдө Швециянын НАТОго мүчөлүгү, Түркия-Армения жана Азербайжан-Армениянын нормалдашуу процесстери, F-16 сатып алуу жана модернизациялоо, Украина дан келишими каралды.

Фидан менен Блинкен эки өлкөнүн ортосундагы орток күн тартибиндеги маселелерди талкуулоо үчүн мүмкүн болушунча тез арада кайрадан жолугууга эрктерин баса белгилешти.

Хакан Фидан швециялык кесиптеши Тобиас Бильстрём менен да телефон аркылуу сүйлөшкөн болчу.

Тышкы иштер министрлигинен берилген маалыматка караганда, Бильстрём Фиданды жаңы кызматы менен куттуктады. Фидан Швециянын НАТОго мүчөлүгү үчүн конкреттүү кадамдардын ташталышы керектигин баса белгиледи.

Фидан менен Бильстрём Туруктуу биргелешкен механизм жыйынынан кийин кайрадан байланышууга макул болушту.

Түркия Швециянын НАТОго мүчөлүгүнө вето коюуда. Анкара, террордук уюмдарга ачык колдоо көрсөткөн Швециядан терроризмге каршы күрөштө конкреттүү кадамдарды таштоосун күтүүдө.

Бир тараптан Беларустун тышкы иштер министри Сергей Алейник тышкы иштер министри болуп дайындалган Хакан Фиданды куттуктады.

Беларустун Анкара элчилигинин социалдык медиа баракчасындагы маалыматта Алейниктин түрк кесиптеши Фиданды куттуктаганы белгиленди.

Билдирүүдө «Алейник Фиданга ден соолук жана кызматында ийгилик каалады» деп айтылды.

Тышкы иштер министри болуп дайындалган Хакан Фиданды куттуктагандардын арасында Армениянын тышкы иштер министри Арарат Мирзоян менен Бразилиянын тышкы иштер министри Мауро Виейра да бар.