Шентоп менен Санердин жолугушуусу

Түркия Улуу Улуттук Жыйынынын (Парламент) төрагасы Мустафа Шентоп Түндүк Кипр Түрк Республикасынын Премьер-министри Эрсан Санер жана анын делегациясы менен кечээ Парламентте жолугушту.

Парламент төрагалыгынын билдирүүсүнө ылайык, Шентоп сөз сүйлөп, Түркия үчүн Түндүк Кипр Түрк Республикасынын маанисин жана артыкчылыгын белгилеп, эки өлкөнүн ортосундагы кызматташтыктын күндөн күнгө күчтөнүп бараткандыгын көрүү сыймыктандырганын айтты.

Шентоп кызматташтык жана тилектештик духуна ээ болгон Түркия менен Түндүк Кипр Түрк Республикасынын бардык кыйынчылыктарды жеңүүгө эрки жана күчү бар экендигин билдирип: «Ковид-19 эпидемиясы бүткүл дүйнөнү терең каптаган мезгилде, биз Кипрдеги түрк боордошторубузга керектүү колдоо көрсөтүү үчүн бардык күч-аракетибизди жумшап жаткандыгыбызды билишиңизди каалайм»,-деп айтты.

Шентоп, Түркия Улуу Улуттук Жыйынынын Кипр маселеси боюнча болуп жаткан окуяларды, ар дайым болуп келгендей, жакындан байкагандыгын айтып: «50 жылдан ашуун убакыттан бери сүйлөшүлүп келе жаткан Кипр маселесине федерация моделинин рум тараптын «мен гана аралдын ээсимин» деген менталитетинен улам чечиле албаганы ачык»,-деп айтты.

Шентоп: «Аралда эки башка эл, эки башка демократиялык буйрук жана эки өзүнчө мамлекет бар. Чечим ушул фактыларга негизделген ыкма менен гана мүмкүн болот. Ушул алкакта биз Кипр түркүнүн эгемендүү теңчиликтин негизинде эки мамлекеттүү чечимин колдойбуз. Эл аралык коомчулукка да Кипр түрк калкынын чечүүчү жол табуу эркине урмат-сый көрсөтүшү керектигин билдиребиз. Кипр түрк элинин жашоосун, эркиндигин жана келечегин камсыздоо, алардын тынчтыгын, гүлдөп-өнүгүүсүн жана коопсуздугун камсыз кылуу, өнүгүүсүн сактап калуу жана аларды дүйнө менен интеграциялоо биздин артыкчылыктуу багыттарыбыз болуп кала берет. Түркия, Кипр түрк эли менен бирдей жолду уланта берет»,-деди.

Түндүк Кипр Түрк Республикасынын Премьер-министри Эрсан Санер, Кипр түрк эли адилеттүү күрөшүн улантып жатканда, өз мекенинен алган күч жана күч-кубат аркылуу өз жолун уланта берерин билдирди жана аларда бул маселе боюнча эч кандай тартынуу болбой турганын белгиледи.