Израилдин жардам күткөн палестиналыктарга кол салуусунан 6 адам каза болду

Израиль армиясынын Газа шаарында гуманитардык жардам күткөн палестиналыктарды бутага алышынын натыйжасында 6 киши каза болду.

Палестинанын расмий агенттиги WAFAнын кабарына караганда, Израиль армиясы Газа шаарынын ар кайсы аймактарына кол салууларын улантууда.

Израиль күчтөрүнүн Газанын чыгышындагы өнөр жай аймагында гуманитардык жардам күткөн жарандарды бутага алышынын натыйжасында 6 палестиналык каза болду.

Израиль армиясы Шифа ооруканасынын айланасындагы үйлөрдү басып алып, курчоого алган учурда ондогон адам каза болуп, көптөгөн адамдар жарадар болуп, урандылардын астында калды.

Израилдик согуштук учактардын Газанын батышындагы Шати качкындар лагеринде 4 үйдү бутага алуусунда көптөгөн палестиналык каза болду.

Израиль Газа тилкесинде гуманитардык жардам күткөн палестиналыктарды буга чейин да көп жолу бутага алган.

Израиль армиясынын 29-февралда Газанын түштүгүндөгү Рашид көчөсүндөгү Наблуси кесилишинде гуманитардык жардам күткөн палестиналыктарды бутага алган кол салуусунда 118 киши каза болуп, 760 киши жараланды.

Палестинанын Мыйзам чыгаруу кеңешинин мүчөсү Мустафа аль-Бергуси Израиль армиясынын Газада гуманитардык жардам күткөн 560 палестиналыкты өлтүргөнүн, 1500дөн ашуунун жарадар кылганын жарыялады.

Израил армиясы 2023-жылдын 7-октябрынан бери жарандык конуштарды, ооруканаларды, мектептерди жана жер которгон палестиналыктардын баш калкалоочу жайларын бутага алган чабуулдарын улантып, ошондой эле гуманитардык жардамдын киришине тоскоол болуу менен элди ачка калтырган 2,3 миллион калкы бар Газа тилкесинде чоң гуманитардык кырсык болуп жатат.