Donald Tramp tәrәfdarları Konqres binasına basqın tәşkil edib: ölәn vә yaralananlar var

Amerika Birlәşmiş Ştatlarının paytaxtı Vaşinqtonda prezident Donald Tramp tәrәfdarlarının Konqres binasına tәşkil etdiyi basqından sonra yaşanan hadisәlәrdә 4 nәfәr hәyatını itirib, әn az 52 nәfәr hәbs edilib. 

Ölkәdә 15 günlük fövqәladә vәziyyә elan edilib. 

ABŞ KİV-dә yer alan xәbәrlәrdә fövqәladә vәziyyәtin 21 yanvar tarixinә qәdәr davam edәcәyi bildirilib. 

Şәhәrdә yerli vaxtla saat 18.00-dan etibarәn komendant saatı elan edilib.

Paytaxtda etiraz aksiyası keçirәn Donald Tramp tәrәfdarlarının bәzilәri Konqres binasına daxil olub.  Polis binaya daxil olan etirazçılara bibәr qazı ilә müdaxilә edib. Binada baş verәn hadisәlәr zamanı bir qadın silahla yaralanıb. 

Tәhlükәsizlik qüvvәlәri Konqres binasının yaxınlığında partlayıcı maddәnin aşkar edildiyini vә zәrәrsizlәşdirildiyini açıqlayıb. Yaranmış qarışıqlığa görә keçirilәn  prezident seçkilәrinin nәticәlәrinin müzakirә olunduğu iclas dayandırılıb vә iclasa rәhbәrlik edәn vitse-prezident Mayk Pens binadan çıxarılıb. Qanunverici orqanın nümayәndәlәri binadan tәxliyә olunub. Baş verәn hadisәlәr nәticәsindә çox sayda polis әmәkdaşının da yaralandığı bildirilib.
ABŞ-ın yeni seçilmiş prezidenti Co Bayden mәtbuat konfransı tәşkil edәrәk  ABŞ demokratiyasına  vә hüququn aliliyinә qarşı hücumların dayandırılması ilә әlaqәdar çağırış edib.
Co Bayden Donald Trampa müraciәt edәrәk deyib: ‘‘Kameraların qarşısına çıxmalıdır vә bu mühasirәnin qarşısını almalıdır’’.

Pensilvaniya valisi Tom Volf rәsmi ‘‘Twitter’’ sәhifәsindә verdiyi açıqlamada paytaxt Vaşinqtonda etirazçıların Konqres binasına daxil olmasını ‘‘çevrilişә cәhd’’ adlandırıb.

Mәlumata görә, Donald Tramp tәhlükәsizlik qüvvәlәrinә Konqres binasındakı hadisәlәrin qarşısının alınması ilә әlaqәdar göstәriş verib.

Donald Tramp rәsmi internet sәhifәsindә etirazçılara müraciәt edәrәk  deyib: ‘‘Seçki nәticәlәrini oğurladılar. Ancaq indi siz evinizә getmәlisiniz''.

Donald Tramp hadisәlәr başlamazdan әvvәl verdiyi bәyanatda seçki nәticәlәrini qәbul etmәyәcәyini vә mübarizә aparmağa davam edәcәyini bildirmişdi.