28.01.2021
bügünki türkiye gézitliride asasiy salmaqni igiligen xewerlirimiz töwendikiche:
«‹weten› géziti», «jumhur reis erdoghan élon musk bilen körüshti» serlewhilik xewiride, munu uchurlargha orun ajratti:
jumhur reis rejep tayyip erdoghan «Tesla» we «SpaceX» ning qurghuchisi élon musk bilen téléfonda körüshti. söhbette türkiyediki ammiwi we xususiy igiliktiki organlar bilen shirketler otturisida alem téxnikisi qatarliq oxshimighan sahelerde hemkarliq ornitishqa munasiwetlik mesililer muzakire qilindi.
«‹hörriyet› géziti», «dunya sehiye teshkilatidin türkiyege medhiye» serlewhilik xewiride, munu uchurlargha orun ajratti:
dunya sehiye teshkilatining türkiye alahide wekili doktor batir bérdiklichéw türkiyediki waksina emlesh xizmetlirini medhiyelep: «nahayiti qisqa waqit ichide, 1 milyondin artuq kishige waksina emlendi. türkiyening döletlik waksina emlesh programmisi we iqtidari intayin küchlük we ünümlük yolgha qoyulmaqta» dédi.
«‹star› géziti», «türk alimning zor muweppeqiyiti» serlewhilik xewiride, munu uchurlargha orun ajratti:
awistiriyediki biyo téxnika shirkitining qurghuchisi we aliy dériktori, esli türkiyelik alim proféssor doktor kamil önder engliyede otturigha chiqqan téz tarqilishchan kowid-19 ning yéngi türini téz bayqaydighan «PCR» sinaq uskinisini yasap chiqti. kamil önder: «(sinaq) 60 minuttin 90 minutqiche netijige érishidu. pütkül jeryan tertipke sélishqa éhtiyajsiz halda dawamlishidu. u intayin erzan hem nahayiti téz, bumu chong bir ewzellik» dédi.
«‹sabah› géziti», «türkiyeni jelp qilish merkizige aylandurighan reqemler élan qilindi» serlewhilik xewiride, munu uchurlargha orun ajratti:
xelqara pul fondi teshkilati «IMF» ning mölcherlirige asaslanghanda, türkiye yuqum bashlanghandin buyanqigha oxshash bu yilmu iqtisadiy zoriyishni dawamlashturidiken. küchlük tedbirlerni ishqa sélip, yuqumgha qarimastin dawamliq éshishini qolgha keltürgen türkiyege xelqara pul fondi teshkilati «IMF» din rohiy keypiyatini yuqiri ktüridighan mölcher yétip keldi. xelqara pul fondi teshkilati «IMF» ning mölcherliishiche, türkiye bu yil %6 éshishni qolgha keltüridiken we bu ish türkiyeni jelp qilish merkizige aylanduridiken.
«‹yéngi shepeq› géziti», «dunya cholpini imza qoydi» serlewhilik xewiride, munu uchurlargha orun ajratti:
arsénaldin fenerbahche komandisigha heqsiz qoshulghan dunyagha dangliq putbol cholpini mesut özilning imza qoyush murasimi ötküzüldi. murasimda sériq-kök renglik forma kiyidighanliqidin intayin xushal bolghanliqini éytqan mesut özil: «bu fenerbahche üchün bu bir chüsh idi, men üchünmu bu bir xiyal idi. her ikki terep üchün yaxshi bir baghlinish bolghusi» dédi.
