әли әрбаш мусулман диний рәһбәрләргә айасофйа җамәси һәққидә мәктуп йоллиди

түркийә авази радийоси хәвири: түркийә диний ишлар идариси башлиқи пирофессор доктор әли әрбаш мәктубида, «айасофйаи җами кәбир шәриф» ниң йеңидин тирилгәнликини билдүрүп, қайтидин җамәлик салаһийитигә ериштүрүлгәнликидин һес қилған хушаллиқини һәмбәһирлиди.

әли әрбаш һәр бир мусулманға охшаш өзиниңму бу өзгириштин һес қилған җушқунлуқ вә хушаллиқини ортақлишишни халиғанлиқини тилға алди.

әли әрбаш мусулманларниң 86 йилдин бери «айасофйаи җами кәбир шәриф» кә болған чоңқур сеғинишини әскәртип, түркийәдики һәр бир мусулманниң қәлбидә айасофйа сөйгүсиниң мәвҗутлуқини сақлап кәлгәнликини,  шу вәҗидин қанчилиған йиллардин буйан ибадәтханиға айландурушини тәләп қилип йүрүшләр елип берилғанлиқини,  тийатир вә һәтта  шеир- дастанларниң йезилғанлиқини билдүрди.

мусулманларниң «айасофйаи җами кәбир шәриф» кә сазавәр болғанлиқидин қанчилик шадлиққа чөмгәнликини тилға алған әли әрбаш: "алллаһқа һәмду – саналар болсунки, мана бүгүн айасофйа өз тәбиитигә (характериға) игә болди.  җумһур рәисимизниң қәтий ирадиси билән буниңдин кейин аллаһқа сәҗдә қилинидиған җайға өзгәрди. үмид қилимәнки, айасофйаниң қайта тирилиши мәсҗиди әқсаниң азад қилинишиниң бешарити болғуси. униң бу тирилиши иншааллаһ, изилгән вә азап ичидики мөминләрниң кәлгүси үчүн үмид мәнбәси шундақла адаләт, рәһим-шәпқәт вә әхлақ асасида қәд көтүргән мәдәнийәтимизниң қайтидин гүллинишиниң тунҗи бәлгиси болғуси» деди.

әли әрбаш мусулман диний рәһбәрләрниң алдимиздики қурбан һейтиниму тәбрикләп: «җанаплириңлар билән биргә қисқа вақит ичидә айасофйада бир сәптә болушни үмид қилип, әң чоңқур, қәлби салам вә һөрмәтлиримни сунимән» деди