heyfa sebya yemen xelqi duch kelgen pajielerni tam resimliri bilen dunyagha anglatmaqta

türkiye awazi radiyosi xewiri: urushqa we weyranchiliqqa qarshi seniti bilen küresh qiliwatqan yemenlik senetchi heyfa sebya 3 yildin buyan yemen xelqi duch kéliwatqan pajielerni we ayallar bilen kichik balilargha körsitiwatqan selibiy tesirlirini tamlargha sizghan resimliri arqiliq anglatmaqta.

özining senet iqtidarini urushning ayallar we kichik balilargha shundaqla pütün xelqqe körsitiwatqan tesirini anglitishqa atighan sebya «sadasiz qurbanlar» témisi astida bashlighan paaliyiti dairiside, xelqning chékiwatqan azablirini sizip chiqish üchün paytext sanaaning urushmu örüp tashliyalmighan tamlirini tallimaqta.

heyfa sebya «sadasiz qurbanlar» herikiti dairiside, 7 chong tam resimi sizip chiqti. resimlerde toqunush sewebidin köchüshke mejbur bolghan ayallar we kichik balilarning azab – oqubetliridin bashqa yene, ösmürlerning mektepke kétiwétip uchrawatqan qéyinchiliqliri, toqunushtiki her qaysi tereplerning bombardiman üchün mekteplerni hujum nishani qilishi, yaki mekteplerning herbiy bazilargha aylanduruwélishi qatarliq mezmunlar namayan qilip bérilidu.

heyfa sebya bu herikitini awghust éyida bashilghanliqini we yemende urush axirlashqangha qeder tamlargha resim sizishni dawamlashturidighanliqini bildürüp, senetning tinchliqperwerlikini qanat yaydurush küchige ige ikenlikini éytti.

eserlirining pütün xelqqe yétip baralishi üchün kocha tamlirining xuddiy körgezmidek rol oynaydighanliqini bildürgen sebya, buni tunji qétim qilmaywatqanliqinin belki buningdin ilgirimu ikki qétim mushundaq paaliyetler bilen shughullanghanliqini éytti.

sebya urush mezgilide ayallar we balilar duch kélidighan azab – oqubetler terepke insanlarning diqqitini tartish üchün bu heriketni bashlighanliqini alahide tekitlidi.

heyfa sebya senitini ipadilesh üchün resim taxtilirining ornigha tamlarni tallighanliqining sewebi üstide toxtilip, «tamlar nepret qusushqa bashlighan idi. men bu tamlarning urushta zulumgha uchrighan ayallar we balilarning azab – oqubetlirini anglatsa, téximu yaxshi bolidighanliqini oylidim» dédi.