engliye bilen xitay otturisida jasusluq we tor hujumi majrasi yüz berdi

türkiye awazi radiyosi xewiri: engliye tashqi ishlar wazariti bayanat élan qilip, xitay bash elchisi ching ziguangning qanunsiz chet el heriketliri qanuni boyiche xitayning engliye zéminida sadir qilghan dölet bixeterlik qanunigha xilap heriketliri sewebidin chaqirtilghanliqini bildürdi.

tashqi ishlar weziri kaméronning buyruqi boyiche xitay bash elchisi jingning chaqirtilghanliqi eskertilgen bayanatta, «engliye xitayning tor hujumliri we jasusluqqa munasiwetlik her xil doklat teyyarlashni öz ichige alghan engliyege qarshi heriketlirini qobul qilmaydu» déyildi.

engliyede xitay üchün jasusluq qilghan kishilerning qolgha élinghanliqidin bésharet bérilgen bayanatta yene, «eyibleshning nishani bolghan chet el istixbarat idarisi, xongkong memuriy rayonining istixbarat idarisidur» déyildi.

engliyede yéqinqi ikki ay ichide, xitaygha chétishliq dep qaralghan jasusluq qilish jinayetliri we tor hujumliri yüz bergen idi.

 2021-yildin 2023-yilghiche bolghan ariliqta, kristofér bérriy (Berry) we kristofér kesh (Christopher Cash) isimlik ikki kishi xitaygha jasusluq qilish jinayiti bilen qolgha élinip, sotqa tartilghan idi.

kristofér bérriy we kristofér keshning xitay istixbarati üchün maqale yézish, uchur toplash, doklat we höjjet teyyarlash bilen shughullanghanliqi؛ kristofér keshning yene ilgiri engliye parlaméntida xitay tetqiqat guruppisida xizmet qilghanliqi ashkarilanghan idi.

ötken hepte engliye dölet mudapie wazaritining herbiy xadimlirining uchuri bar sistéma tor hujumigha uchrighan bolup, xakkérlar ilgiri we hazir xizmet qiliwatqan herbiy xadimlarning kimlik, banka we maash uchurlirini qolgha chüshürüwalghan.

engliye skay niyus (Sky News) téléwiziyesi mezkur hujumning arqisida xitayning barliqini ilgiri sürgen idi.