jumhur reis erdoghan ereb birleshme xelipilikidiki uchrishishlirini dawamlashturmaqta

türkiye awazi radiyosi xewiri: jumhur reis erdoghan dölet ishliri ziyaritide bolush üchün barghan dubeyde ötküzülgen «dunya hökümetler bashliqlar yighini»da söz qilip: «özini xelqara qanundin üstün köridighan israiliye, nechche on yildin buyan ishghal, bulangchiliq, weyran qilish we qirghin qilish siyasetliridin waz kechmidi» dédi.

«rayonimizning tinchliq, xatirjemlik we iqtisadiy tereqqiyat yoli pelestin dölitining qurulushini bésip ötidu» dégen jumhur reis erdoghan, sözini dawamlashturup: «eger israiliye menggülük tinchliq ornitishni xalisa, kéngeymichilik arzulirini emelge ashurushni toxtitip, 1967-yilidiki chégralar asasida musteqil pelestin dölitining mewjutluqini étirap qilishi kérek... 1967-yilidiki chégralar ichide sherqiy quddusni paytext qilghan musteqil, igilik hoquqluq we jughrapiye jehettin bir gewdileshken pelestin döliti qurulmay turup tashlinidighan her bir qedem yérim qalidu. biz pelestinlik qérindashlirimizni hergizmu ige-chaqisiz, charisiz we yalghuz tashlap qoymaymiz» dédi.

u yene: «men yéqindin buyanqi birleshken döletler teshkilati pelestin musapirlar orginining izzet-abruyini töküsh urunushliridin epsuslanghanliqimizni bildürmekchimen. wijdanliq döletlerni iyordaniye, süriye, liwan we pelestin zéminliridiki 6 milyon musapirning hayatliq yoli bolghan organ (UNRWA)ni qoghdashqa chaqirimen» dégenlerni qeyt qildi.

yene bir tereptin, jumhur reis erdoghan ikki tereplik uchrishishlirining bir qismi süpitide ereb birleshme xelipiliki dölet reisi muhemmed bin zayid al nehyan bilen yépiq söhbet ötküzdi.

türkiye jumhuriyiti jumhur reislik mehkimisi uchur – alaqe ishliri idarisi bayanat élan qilip, söhbet jeryanida, türkiye bilen ereb birleshme xelipiliki otturisidiki siyasiy we iqtisadiy munasiwetler, rayon we dunyawi mesililer hemde israiliyening pelestin zéminlirigha qaratqan hujumlirining muzakire qilinghanliqini tekitlidi.

bayanatta, erdoghanning israiliyening pütün ghezzege oxshash refahqa qilghan hujumlirinimu qobul qilghili bolmaydighanliqini, xelqara jemiyet, xelqara teshkilatlar, bolupmu birleshken döletler teshkilati xewpsizlik kéngishi we alaqidar döletlerning tedbir qollinip israiliyeni tézdin toxtitishi kéreklikini otturigha qoyghanliqigha isharet qilindi.

bayanatta, jumhur reis erdoghanning ikki döletning térrorluqqa qarshi turushta hemkarliq ornitishining zörüriyitini otturigha qoyup, türkiyening barliq térrorluq teshkilatlirigha qarshi perqlendürüp olturmastin küresh qilidighanliqini bildürgenliki eskertildi.

jumhur reis erdoghan yene liwiye milliy birlik hökümiti bash ministiri abdulhemid dibeybe bilenmu yépiq yighin achti.

uningdin bashqa, moldawiye pirézidénti muhemmed muyzuzu bilen körüshken erdoghan, xelqaraliq meblegh sélish shirketliri we emirlik aililiri igidarchiliqidiki shirketlerning wekilliri bilenmu körüshti.