erdoghan dunya islam alimliri muzakire yighinida söz qildi
jumhur reis rejep tayyip erdoghan: «ghezzede 7-öktebir (2023) din buyan insaniyet tarixidiki eng wehshiyane qetliamlardin biri yüz bériwatidu» dédi.
türkiye awazi radiyosi xewiri: jumhur reis rejep tayyip erdoghan istanbulda ötküzülgen dunya islam alimliri muzakire yighinining échilish murasimigha qatnashti we söz qildi.
u: «özini <erkinlik döliti> dep atiwalghanlar, isirailiyening menpeetige kelgende derru fashizmning tügminige su quyup bériwatidu. biz rak késilige giriptar bolghan bimarlarni öz ichige alghan 400 din artuq ghezzelik bimar we yaridarlarni dölitimizning her qaysi doxturxanilirida dawalawatimiz. wijdangha ige dölet we jemiyetlerdin bashqa, dunya sistémisining jojayinliridin isirailiyege bésim qilishini kütüsh, pütünley bihudiliktur. biz isirailiyening wijdan awazini antisémitizm kaltiki bilen ujuqturushigha ruxset qilmaymiz» dédi.
u ghezzede isirailiyening hujumliri bashlanghan 7-öktebir (2023) insaniyet tarixidiki eng wehshiyane qetliamlardin birining yüz bérwatqanliqini eskertip: «isirailiye bigunah qan töküshni dawamlashturuwatidu. 15 ming kichik bala wehshiylerche öltürüldi. 35 ming pelestinliq qérindishimiz shéhit qilindi. 2 milyon kishi yurt-makanliridin qéchishqa mejbur boldi. 7-öktebirdin ilgirimu üsti ochuq türme bolghan ghezze 219 kündin buyan gitlér gérmaniyeside körülgendek qirghin qilip yoqitish lagérigha aylandi» dédi.
u sözini mundaq dawamlashturdi:
«barliq döletlerni baldurraq pelestin dölitini étirap qilishqa chaqirimen. hamas ghezzede uzun muddetlik urush toxtitish yolida muhim qedemni basti. isirailiye bash ministiri nétanyahu hökümiti bolsa, refahtiki bigunah kishilerge hujum qilish bilen jawab berdi.»
u axirida, afghanistanning baghlan wilayitide yüz bergen kelkün apitide jénidin ayrilghanlargha allahtin tehmet tilesh bilen sözini axirlashturdi.
afghanistanning baghlan wilayitide yüz bergen kelkünde 300 din artuq kishining jénidin ayrilghanliqi bildürüldi.
