türkiye ghezzediki türkiye - pelestin dostluq doxturxanisining bombardiman qilinishini eyiblidi
türkiye ghezzediki türkiye- pelestin dostluq doxturxanisigha qilinghan hujumni eng küchlük shekilde eyibleydighanliqini uqturdi.
türkiye awazi radiyosi xewiri: türkiye jumhuriyiti tashqi ishlar ministirliqi yazma bayanat élan qilip: «biz israiliyening ghezzediki türkiye-pelestin dostluq doxturxanisigha qilghan hujumini eng küchlük shekilde eyibleymiz. kordinatlirini öz ichige barliq zörür uchurliri israiliye dairiliri bilen ortaqlishilghan bolushigha qarimay, ghezzediki birdinbir rak késellikliri doxturxanisining bu shekilde hujum qilinishini izahlighili bolmaydu» dégenlerni qeyt qildi.
«ghezzediki pelestin xelqini eng asasliq hoquqliridin mehrum qilishni meqset qilghan qorshaw we insan qélipidin chiqqan hujumlar, xelqara qanungha ochuq - ashkara xilaptur» dégen ibarilerge orun bérilgen bayanatta, israiliyening ghezze ahalisini qara – qoyuq halette zerbe obyékti qilishtin waz kéchishi kérekliki tekitlendi.
ghezzediki rak bimarliri dawaliniwatqan birdinbir doxturxana bolghan «türkiye- pelestin dostluq doxturxanisi» pelestindiki eng chong doxturxanilarning biri idi.
türkiye teripidin texminen 34 ming 800 kiwadrat métir jaygha sélinghan üch qewetlik bu doxturxana, 180 kariwatliq bolup, qurulushi 2017- yili pütküzülgenidi.
