fidan: pelestinliklerning mewjutluqini inkar qilish israiliyege tinchliq élip kelmeydu

türkiye awazi radiyosi xewiri: ministir xaqan fidan paytext enqerede daniye tashqi ishlar ministiri lars lokké rasmussén bilen ötküzgen qoshma muxbirlarni kütüwélish yighinida, israiliye-pelestin toqunushini tilgha élip: «israiliye choqum bir yol tallishi kérek. pelestinliklerning mewjutluqini inkar qilish, heq – hoquqini nezerdin saqit qilish, bésim ishlitish we zulum qilish israiliyege tinchliq élip kelmidi we élip kelmeydu» dédi.

«ghezze mesiliside pütkül insaniyet bir achalgha duch keldi. bu yerde ya dunyaning herqaysi jaylirigha tarqilidighan chong urush yüz béridu yaki büyük tinchliq barliqqa kélidu» dégen fidan, sözini dawamlashturup: «biz (rasmusséngha) pelestin dölitining bir qismi we dölet sistémisidiki bir siyasiy partiye bolghan hamasni térrorluq teshkilati dep qarimaydighanliqimizni éyttuq» dégenlerni qeyt qildi.

ministir fidan yene, israiliyening xelqara qanunni depsende qilghanliqini tilgha élip: «biz bu zulum aldida süküt qilip turalmaymiz. insanperwerlik yardemlirining ghezzege üzlüksiz yetküzülüshige kapaletlik qilish üchün tirishish lazim. biz ezeldin zulumgha shérik bolmiduq we bolmaymiz. bizning israiliyedin telep qilidighinimiz, tinchliq ornitish chaqiriqimizgha qulaq sélishidur» dédi.

daniye tashqi ishlar ministiri rasmussénmu türkiyening rayon, dunya we ottura sherq siyasitide intayin muhim rol oynawatqan küch ikenlikini éytti.