تۈركىيەدە پەلەستىن شېھىتلىرى ئۈچۈن ئۈچ كۈنلۈك «مىللىي ماتەم»  ئېلان قىلىندى

تۈركىيە ئاۋازى رادىيوسى خەۋىرى: جۇمھۇر رەئىس رەجەپ تاييىپ ئەردوغان ئاممىۋى ئورتاقلىشىش تور بېتىدىكى سەھىپىسىدە، بۇ ھەقتە ئېلان قىلغان باياناتىدا مۇنداق دېدى:

«تۈركىيە بولۇش سۈپىتىمىز بىلەن، پەلەستىنلىك قېرىنداشلىرىمىز باشتىن كەچۈرۈۋاتقان قورقۇنچلۇق ئازاب - ئوقۇبەتلەرنى چوڭقۇر ھېس قىلىۋاتىمىز. كۆپىنچىسى بالىلار ۋە بىگۇناھ پۇقرالاردىن تەشكىل تاپقان مىڭلىغان شېھىتلىرىمىزغا بولغان ھۆرمىتىمىزنىڭ نامايەندىسى سۈپىتىدە دۆلىتىمىزدە ئۈچ كۈنلۈك <مىللىي ماتەم> ئېلان قىلىندى.»

ئەردوغاننىڭ باياناتىدا، تۈركىيەنىڭ «مىللىي ماتەم» قارارىغىمۇ ئورۇن بېرىلدى.

تۈركىيەنىڭ ئۈچ كۈنلۈك «مىللىي ماتەم» ھەققىدىكى قارارىدا، ئىسرائىلىيەنىڭ پۇقرالارنى نىشان قىلىۋاتقان، 2023 – يىلى 17 – ئۆكتەبىر كۈنى دوختۇرخانىغا قىلغان ھۇجۇملىرى نەتىجىسىدە ئادەم ئۆلۈش ۋە يارىلىنىش ئەھۋالىنىڭ كۆرۈلگەنلىكى، بۇ مۇناسىۋەت بىلەن پەلەستىن خەلقىنىڭ قورقۇنچلۇق ئازاب – ئوقۇبەتلىرى ھەم دەرد – ئەلەملىرىنى ئورتاقلىشىش مەقسىتىدە ئۈچ كۈنلۈك «مىللىي ماتەم ئېلان قىلىنغانلىقى» ئەسكەرتىلدى.

قاراردا، 2023-يىلى 21 – ئۆكتەبىر شەنبە كۈن پاتقانغا قەدەر، دۆلەت مىقياسىدا ۋە تۈركىيەنىڭ چەت ئەللەردىكى ئەلچىخانا-كونسۇلخانىلىرىدا تۈركىيە بايرىقىنىڭ يېرىم چۈشۈرۈلىدىغانلىقى تەكىتلەندى.

ئىسرائىلىيە غەززەنىڭ مەركىزىدىكى ئەلئەھلى باپتىست دوختۇرخانىسىنى بومباردىمان قىلغان، بۇ قىرغىنچىلىقتا 471 پۇقرا جېنىدىن ئايرىلغانىدى.

ئىسرائىلىيەنىڭ 7-ئۆكتەبىر كۈنى باشلانغان ھۇجۇملىرىدا 3000 دىن ئارتۇق پەلەستىنلىك جېنىدىن ئايرىلدى. 12 مىڭ 500 دىن ئارتۇق ئادەم يارىلاندى.