erdoghan memliketke qaytish sepiride muxbirlarning soallirigha jawab berdi

türkiye awazi radiyosi xewiri: jumhur reis rejep tayyip erdoghan nehchiwan ziyaritini axirlashturup memliketke qaytish sepiride ayropilanda muxbirlarning soallirigha jawab berdi.

u 3-noyabir (2023) da türk döletliri teshkilati yighinining échilidighanliqini, shimaliy qibris türk jumhuriyitining bu yighingha közetküchi eza salahiyitide qatnishidighanliqini bildürdi.

u: «shimaliy qibris türk jumhuriyitining étirap qilinishi, qibris arilida uzun muddetlik tinchliq we xatirjemlikni kapaletke ige qilishni xalaydighan barliq döletler üchün eng toghra tallash hésablinidu. yillar boyiche u yerdiki türk mewjutluqini nezerdin saqit qilishqa urunghanlarning sinimighan yoli qalmidi. emma, basqan her bir qedimi asassiz bolghachqa, netijisi ümidsizlik bilen axirlashti. héchkim bizdin shimaliy qibris türk jumhuriyitining heq-hoquqlirini nezerdin saqit qilishimizni we xilapliq qilishlargha közimizni yumushimizni kütmisun» dédi.

u isirailiye bash ministiri nétanyahuning öktebir yaki noyabirda türkiyeni ziyaret qilidighanliqini bildürüp: «muwapiq waqitta, bu ziyaretning emelge éshishi üchün élip bériliwatqan uchrishishlar dawamlishiwatidu. uningdin kéyin bizmu isirailiyede jawab ziyaritide bolimiz. isirailiye bilen türkiyening nurghun sahelerde hemkarliqi bar. yéngi hemkarliq sahelirining barliqimu bir emeliyet.  bolupmu, yawropa, ukraina-rusiye urushi sewebidin otturigha chiqqan weziyetning tesiride sijil énérgiye menbesi üstide izdiniwatidu. melum bolghinidek, isirailiye tebiiy gazini yawropagha yetküzüsh üstide izdiniwatidu. türkiye arqiliq bu bayliqlarni yawropagha yetküzüsh, eng muwapiq yol. bu toghrida söhbet ötküzüp, muzakirelirimizni bashliduq. buninggha munasiwetlik téxnikiliq söhbetlerni ötküzüsh toghrisida yolyoruq berduq. eng qisqa waqit ichide türkiyede yaki isirailiyede ötküzülidighan muzakirelerde linye, waqti we burghilash rayonlirigha munasiwetlik tepsilatlarni aydinglashturimiz» dédi.

u zengezur we lachin karidori toghrisida toxtilip: «bu jaylarni tinchliq karidorigha aylandurup échishni ümid qilimiz. téxiche urush höküm sürüwatqan  bir karidorni xiyal qilish eqilge sighmaydu. emdi xojali bilen qarabagh üchünmu ezerbeyjanning igilik hoquqi astida uzun muddetlik tinchliq we xatirjemlikni emelge ashurushning waqti yétip keldi. erméniyening wezipisi bolsa, xatirjemlikni emelge ashurush üchün tinchliqni qollashtur.»

u axirida shiwétsiyening nrtogha eza bolushi üstide toxtaldi we mundaq dédi:

 «ular wedisige emel qilsa, bizning parlaméntimizmu wedisige emel qilidu, shuninggha qarita ish köridu.»