chawushoghlu: sudandin aptobus bilen 1490 kishini yolgha salduq

türkiye awazi radiyosi xewiri: diplomatiye ministiri mewlut chawushoghlu sudanda armiye bilen téz yardem bérish küchliri otturisida yüz bergen toqunush sewebidin, 1380 türkiye puqrasi we 13 dölettin 110 kishi bolup jemiy 1490  kishini aptobus bilen sudandin yolgha salghanliqlirini bildürdi.

chawushoghlu tünügün bir téléwiziye qanilida bergen bayanatida, sudandiki ötkünchi basquchning uzun dawamlashqanliqini, shunga bu döletning weziyitining  barghanséri qalaymiqanliship kétiwatqanliqini, bu dölettiki özgirishlerni yéqindin közitiwatqanliqlirini bayan qildi.

ministir chawushoghlu kimning hakimiyet yürgüzüshidin qetiynezer, türkiyening sudan bilen izchil yaxshi ötüp kéliwatqanliqini, bu dölette toqunushlar bashlanghan haman jumhur reis rejep tayyip erdoghanning sudan igilik hoquqi kéngishining reisi, sudan armiyesi qomandani général abdulfettah elburhan we sudan igilik hoquq kéngishining muawin reisi, téz yardem bérish küchlirining qomandani muhemmed hemdan dagalu bilen ayrim - ayrim halda téléfonda körüshüp, türkiyening urush toxtitish mesilisidiki arzusini yetküzgenlikini bayan qildi.

sudanda uda bir qanche qétim urush toxtitish qarari chiqirilghan bolushigha qarimay, toqunushlarning dawamlashqanliqini, toqunushlarning sheher ichide kocha toqunushliriigha aylinip ketkenlikini eskertken chawushoghlu xartumdiki toqunushlarda ghayibtin kelgen bir oqning türkiyening xartum elchixanisining dérizisige tegkenlikini, xartumdiki yunus emre instituti binasi rakétamiyot chüshkenlikini, emma anche chong ziyan körülmigenlikini qeyt qildi.

ministir chawushoghlu sudan armiyesi bilen téz yardem bérish küchliri mensupliri otturisida yüz bergen toqunushlarda türkiye puqrasi qubilay dadukning 2 yashliq qizi élinning hayatidin ayrilghanliqini eskertti.

roza héyt munasiwiti bilen sudanda urush toxtitish kélishimige riaye qilinip, urush toxtitilghan haman bu dölettiki türkiye puqralirini tarqaqlashturushqa bashlighanliqlirini éytqan chawushoghlu  türkiye puqralirini hawa, déngiz we quruqluq yolliri arqiliq tarqaqlashturushqa tirishiwatqanliqlirini, türkiye puqralirini éfiyopiye arqiliq tarqaqlashturush eng yaxshi chare dep qarawatqanliqlirini bildürdi.

chawushoghlu sudandiki türkiye puqralirini tarqaqlashturush xizmitige alaqidar sözlirini mundaq dawamlashturdi:

«sudandin 1490 ademni aptobus bilen yolgha salduq. ularning ichidiki 640 kishi éfiyopiyege yétip bardi, 189 kishi chégradin ötüp, eddis ebébege qarap yolgha chiqti. puqralrimizni türkiyege ayropilan arqiliq keltürüshni pilanlawatimiz. hazir 850 kishi seper üstide. ete yene eger qalghan puqralirimiz bar bolsa, ularnimu aptobus bilen yolgha salimiz. yene bir tereptin, sudan portidinmu 23 puqramiz bizge iltimas qildi. tünügündin bashlap ular bilen téléfon alaqimiz üzülüp qalghanidi. kéyin ular bilen tekrar alaqilashtuq. ularni ete kech saet 9 da paraxot bilen jiddege yolgha salimiz. andin nöwetchi ayropilanlar bilen ularni jiddedin dölitimizge qayturup kélimiz. ularning chégradin ötüshige qolayliq yaritip bérish üchün, bügün éfiyopiye tashqi ishlar ministiri déméké mékonnén bilen téléfonda körüshtüm.»

sudan muawin diplomatiye ministiri eli essadiq bilenmu daim téléfon alaqisi qilip turuwwatqanliqlirini bayan qilghan chawushoghlu türkiyening qapsilip qalghanlarni tarqaqlashturush mesiliside bir marka ikenlikini, nurghun döletlerning sudandiki puqralirini tarqaqlashturush üchün enqeredin yardem telep qilghanliqini, sudandin tarqaqlashturulghan 1490 kishining ichide 13 dölettin 110 kishining barliqini tekitlidi.