түркийә мексиканиң аталмиш «әрмәни дәвалири» қарариға қаттиқ наразилиқ билдүрди

түркийә авази радийоси хәвири: түркийә ташқи ишлар министирлиқи, мексика кеңәш палатасиниң 1915-йилдики вәқәләргә  мунасивәтлик аталмиш «әрмәни дәвалири» ни етирап қилиш қарарини қаттиқ әйибләп байанат елан  қилди.

министирлиқниң байанатида, мундақ дейилди: мексика кеңәш палатаси 2023-йили 2-айниң 8-күни мақуллиған вә 1915-йилдики вәқәләрни <ирқий қирғинчилиқ> дәп етирап қилип мақуллиған бу қарар, сийасий муддиа билән тарихни қайта йезишқа урунуш тәшәббуси болуп, һечқандақ күчкә игә әмәстур. биз бу қарарни рәт қилимиз вә қаттиқ әйибләймиз. шуни әскәртимизки, қанун чиқириш органлириниң тарихни изаһлаш вә бу һәқтә һөкүм чиқириш һоқуқи йоқтур.»

байанатта, бу тәшәббусниң, 1948-йилдики бирләшкән дөләтләр тәшкилатиниң ирқий қирғинчилиқниң алдини елиш вә җазалаш әһдинамиси вә йавропа кишилик һоқуқ соти (ECHR) ниң «1915-йилдики вәқәләр қанунлуқ талаш – тартишлиқ мәсилә» дәп бекитилгән қарариға хилап икәнлики тәкитләнди.

байанатта йәнә, бу хәтәрлик қарарниң мексикадин кәлгән издәш - қутқузуш әтрәтлириниңму иштирак қилшида түркийәдә йүз бәргән йәр тәврәш апитидә талапәткә учриғанларни издәш - қутқузуш паалийәтлири давамлишиватқан вақитқа тоғра кәлгәнлики, буниң толиму әпсуслинарлиқ иш икәнлики қәйт қилинди.

байанатта, бу қарарниң түркийә – мексика достлуқиға йарашмайдиғанлиқи тәкитлинип мундақ дейилди:

«мексика кеңәш палатасини тарихтин дүшмәнлик йаритишқа урунуватқан бәзи күчләрниң күнтәртипигә хизмәт қилишниң орниға, бу хаталиқини түзитишкәм чақиримиз.»