әрдоған: гиретсийә баш министириниң сөзлири районниң тәқдирини бәлгиләшкә йәтмәйду

түркийә авази радийоси хәвири: җумһур рәис рәҗәп таййип әрдоған истанбулда җүмә намизидин кейин журналистларға бәргән байанатида, гиретсийәниң йеқинқи мәзгилләрдә ташлаватқан қәдәмлири һәққидә тохтилип мундақ деди: «гиретсийә бәзи аралларни қоралландуруш арқилиқ һәм <лозан келишими> һәм башқа келишимләргә хилап қәдәмләрни ташлимақта. гиретсийә баш министири кириакос мичотакисниң сөзлири болупму районниң тәқдирини бәлгиләшкә йәтмәйду.»

мичотакис, шивейтсарийәниң давос шәһиридә чақирилған дунйа иқтисад мунбири йиғини әснасида бәргән байанатида, түркийә билән гиретсийә оттурисида йеқинқи үч йилдин буйан бир қатар җиддийчиликләрниң оттуриға чиқиватқанлиқини ейтқан вә сақлиниватқан мәсилиләргә һәл қилиш чариси тепиш мумкинчиликиниң барлиқини илгири сүргәниди.

у түркийә билән гиретсийә оттурисидики асаслиқ мәсилиниң «әгә деңизи» вә «шәрқий ақдеңиз» ни башқуруш һоқуқи саһәлири икәнликини илгири сүрүп мундақ дегәниди: «биз түркийә билән әқиллиқ чоңларға охшаш сөһбәт өткүзүп, асаслиқ мәсилимизни һәл қилалишимиз керәк.»

мичотакис, йеқинда һәм гиретсийә һәм түркийәдә сайлам өткүзүлидиғанлиқини әскәртип, «мениңчә, җиддийчиликләрни азайтиш, ортақ мәнпәәт мәсилилиридә хизмәт ишләш, ихтилаплиримиз көрүлгәндә бирдәклик һасил қилишниң түрлүк чарә - тәдбирлири бар» дегәниди.

йәнә бир тәрәптин, әрдоған, «‹The Economist› журнили» ниң түркийәдики сайламға мунасивәтлик сәтчилик муқависи тоғрисидики соалға, «түркийәниң тәқдирини әнглийәниң бу журнили бәлгилийәләмду? йақ, һәргиз ундақ әмәс, әксичә түркийәниң тәқдирини әзиз хәлқим (түркийә хәлқи) бәлгиләйду. әзиз хәлқим немини халиса, түркийәдә шу әмәлгә ашиду» дәп җаваб бәрди.