erdoghan: téximu adil we heqqaniyetchil yéngi dunya tertipi ornitilishi kérek
jumhur reis erdoghan dunya nopusining mutleq köp qismigha sel qaraydighan az sanliqlarning bext – saaditini chiqish nuqta qilidighan emes, pütkül insaniyetke bext élip kélidighan téximu adil bir dunya tertipi ornitilishi kéreklikini éytti.
türkiye awazi radiyosi xewiri: 6 – nöwetlik asiyada hemkarliq we ishenchni ashurush tedbirliri bashliqlar yighini, qazaqistanning paytexti astanada bashlandi.
musteqilliq sariyida qazaqistan pirézidénti qasim jömert toqayéwning sahibxaniliqida bashlanghan bashliqlar yighinining échilishida, jumhur reis erdoghan nutuq sözlidi.
dunya tengpungluqning özgirip, pütkül insaniyetning nurghun sahede éghir sinaqlargha duch kélidighan bir dewrni bashtin kechürüwatqanliqini bayan qilghan erdoghan, buninggha islam we chet elliklerge öchmenlik qilish qatarliq tehditlerningmu qoshulghanliqini tekitlep mundaq dédi: «dunya nopusining mutleq köp qismigha sel qaraydighan az sanliqlarning bext – saaditini chiqish nuqta qilidighan emes, eksiche, pütkül insaniyetke bext élip kélidighan téximu adil we heqqaniyetchil yéngi bir dunya tertipi ornitilishi lazim.»
térrorluq teshkilatlirigha yardem béridighan, tetür teshwiqat élip baridighan we özige yantayaq bolidighan kishilerni toplash paaliyetlirige qatnishidighan guruhlarning shertsiz halda cheklinishi kéreklikini éytqan erdoghan, afghanistanda tinchliq ornitish we künséri zoriyiwatqan térrorluq paaliyetlirining aldini élishning intayin muhimliqini otturigha qoydi, hemde yighin ishtirakchilirini afghanistanni dawamliq qollashqa chaqirdi.
yene bir tereptin, jumhur reis erdoghan uchrishishliri dairiside, özbékistan pirézidénti shewket mirzayéw bilen körüshti.
