чавушоғлу латин америкада зийарәттә болиду
ташқи ишлар министири мәвлүт чавушоғлу мартта бир қисим латин америка дөләтлиридә зийарәттә болидиғанлиқини билдүрди.
түркийә авази радийоси хәвири: чавушоғлу, латин америка дөләтлириниң әнқәрәдә турушлуқ баш әлчилири вә түркийә бүйүк милләт мәҗлиси даостлуқ гурупписиниң рәислири билән әнқәрә университетида хизмәт йиғини өткүзди, һәмдә бу йәрдә қилған сөзидә, латин америка әллири билән һәмкарлиқни күчәйткәнликлиридин интайин хурсән икәнликлирини тәкитләп мундақ деди: «март ейида бир қисим латин америка дөләтлиридә зийарәттә болимиз, биразилийәдин бир тәклип кәлди, җәнубтин башлап оттура америкаға қәдәр 4 – 5 дөләттә зийарәттә болимиз, мунасивәтлиримизни йәниму йүксәк сәвийәгә йәткүзимиз, мунасивәтлиримизни техиму тәрәққий қилдуруш үчүн кәспдашлиримиз билән, әгәр қобул қилған тәқдирдә, дөләт башлиқлири билән муһим учришишларни елип беришни үмид қилимиз.»
латин америка районидики хәлқаралиқ тәшкилатлар биләнму зич һәмкарлиқ ичидә икәнликлирини әскәрткән чавушоғлу, оттура америка бир гәвдилишиш гурупписи билән келәр қетимлиқ йиғинни алий дәриҗилик рәһбәрләр сәвийәсидә чақиришни халайдиғанлиқлирини қәйт қилди, түркийәниң латин америка районидики вакаләтханилириниң санини 17 гә йәткүзгәнликлирини, латин америка дөләтлириниң түркийәдики әлчиханилириниң саниниңму 16 гә йәткәнликини, бу җәһәтә наһайити зор илгириләшләрни һасил қилғанлиқлирини, түркийә билән латин америка районидики иқтисадий мунасивәтләрниң йәниму йүксәк сәвийәгә йәткүзүлүши вә содиниң алдидики тосалғуларниң пачақлап ташлинишиниң зөрүрлүкини тәкитләп мундақ деди: «латин америка әллири билән болған мунасивәтлиримизни күчәйтиш нишанимиз, бир гәвдилик роһи асасида ортақ бир келәчәк үчүн һәмкарлиқимизни күчәйтиштур. дәрвәқә, бу даиридә хизмәт ишләватимиз, бу һәқтә ташланғуси қәдәмләрниму әң күчлүк шәкилдә қоллаймиз.»
