әрдоған һолокостни хатириләш мунасивити билән син көрүнүшлүк учур тарқатти
җумһур рәис рәҗәп таййип әрдоған дунйада күнсери күчийиватқан исламға қарши туруш вә чәт әлликләргә өчмәнлик қилишқа «тохта» дейиш керәкликини оттуриға қойди.
түркийә авази радийоси хәвири: әрдоған җумһур рәислик мәһкимиси учур – алақә ишлири идарисиниң хәлқара чоң қирғинчилиқ (һолокост — йәһудий қирғинчилиқи)ни хатириләш күни мунасивити билән ачқан тор бекити weremember.gov.tr да синлиқ учур елан қилди.
инсанийәт мүшкүл бир дәврни баштин кәчүрүватқанлиқини, ковид – 19 йуқуми билән бирликтә ирқчилиқ вирусиниңму күнсери кеңийиватқанлиқини көрүп йәткәнликлирини тилға алған әрдоған: «җамә, ибадәтхана вә черкавға охшаш ибадәт орунлириға қилинған зораванлиқ һәрикәтлиридә наһайити еғир дәриҗидә көпийиш болуватиду. миллий кимлики, диний, тили, ташқи көрүнүши пәрқлиқ қатламларға өчмәнлик қилиш җинайити барғансери әвҗ еливатиду. ирқчилиқ террори җәмийәтниң тинчлиқи вә кишиләрниң бирликтә йашаш ирадисигә зәрбә уридиған бихәтәрлик тәһдитигә айланди. һалбуки, өткән әсирдә мәйданға кәлгән азаблиқ вәқәләр ирқчилиқ идиологийисиниң қандақ азабларни кәлтүрүп чиқиридиғанлиқини көрситип бәргәниди» дегәнләрни қәйт қилди.
милйонларчә инсан җенидин айрилған чоң қирғинчилиқниң, боснийә- гертсеговина, риванда вә камбоджа қирғинчилиқлириниң һәр бириниң хәлқара җәмийәткә мәсулийитини әслитидиған җанлиқ мисал икәнликигә ишарәт қилған әрдоған, өчмәнликкә қарши күрәш қилишниң пәқәт зийанкәшликкә учриғучиларниңла әмәс, пүткүл инсанийәтниң ортақ бурчи икәнликини тәкитлиди.
җумһур рәис әрдоған, чоң қирғинчилиқ, боснийә- гертсеговина, риванда, камбоджа тирагедийәлириниң қайта йүз бәрмәслики үчүн хәлқара җәмийәтниң һәрикәткә өтүши керәкликигә ишарәт қилип: «хусусән рәқәмлик супилар вә нәшрийат – ахбарат орунлириниң тәсиридә әвҗ елип кәткән ислам дүшмәнлики вә чәт әлликләрни йаман көрүш хаһишлириға <тохта> дейилиши керәк» дегәнләрни сөзлиригә илавә қилди.
