türkiye b d t tinchliq qurulushi fondigha töhpe qoshushni dawamlashturidu

türkiye awazi radiyosi xewiri: b d t bash katipi antoniyo gutérrés dunya miqyasidiki 40 tin artuq döletning tinchliq ornitish tirishchanliqigha yardemchi bolush üchün «tinchliq qurulushi fondi wede bérish yighini» orunlashturdi.

mezkur yighingha sin körünüshlük ishtirak qilghan dölitimiz (türkiye jumhuriyiti) muawin tashqi ishlar ministiri, qoshumche yawropa ittipaqi mesililiri bashliqi bash elchi faruq qaymaqchi, tinchliq ornitish tirishchanliqlirining muweppeqiyet qazinishi üchün tinchliq qurulushi fondidin ünümlük paydilinishning muhim ikenlikini otturigha qoydi.

u, türkiyening b d t ning bash katipi gutérrésning 2021- 2024- yilliq tinchliq qurulushi fondi istratégiyesi bashta bolup, toqunushlarning aldini élish, tinchliqni qoghdash, insanperwerlik yardimi, jinsiy barawerlikni qoghdash we köp tereplimilikni qollaydighanliqini bildürdi.

türkiyening b d t ning tinchliq we bixeterlik xizmetlirige izchil töhpe qoshup kéliwatqanliqini we tinchliq saqlash qisimlirini qollashni dawamlashturidighanliqini tilgha alghan qaymaqchi, türkiyening b d t siyasiy ishlar we tinchliq saqlash bölümining yéngiliq yaritish tarmiqigha meblegh ajratqan tunji eza dölet ikenlikini eskertti.

faruq qaymaqchi, türkiyening yene b d t ning her xil sahelerdiki 30 xil ishxanisigha sahibxanliq qiliwatqanliqini bildürüp: «biz b d t tinchliq qurulushi fondigha 2016- yilidin 2020- yilighiche bolghan ariliqta bir milyon dollar töhpe qoshtuq we 2021- yilidin 2024- yilighiche bolghan ariliqtimu yene shunchilik töhpe qoshimiz» dégenlerni qeyt qildi.