türkiye dostumgha qilinghan hujumni eyiblidi

türkiye awazi radiyosi xewiri: türkiye tashqi ishlar ministirliqi bayanat élan qilip, «afghanistan hökümiti bilen hasil qilghan kélishimning rohigha asasen, bir yildin artuq waqittin buyan turuwatqan dölitimizdin tünügün (22- iyul) afghanistangha qaytqan pirézidént birinchi yardemchisi abdurreshit dostum kabul hamid karzai xelqara ayrorudumidin chiqip kétip uzun ötmeyla meydangha kelgen adem bomba hujumini eyibleymiz» dégenlerni qeyt qildi.

hujumda abdurreshit dostum we hemrahlirining talapetke uchrimighanliqi eskertilgen bayanatta, «hayatidin ayrilghanlargha allahtin rehmet tilmeymiz, afghan xelqi we dölitige teziye bildürimiz» déyildi.

xélidin buyan türkiyede istiqamet qiliwatqan afghanistan pirézidént birinchi yardemchisi rashit dostum tünügün kabulgha qaytqanidi. biraq, ayropilan qonup uzun ötmeyla ayrodurumgha yéqin jayda partlash yüz bérip, 14 adem hayatidin ayrilghan, 60 adem yarilanghan؛ dostum héchqandaq talapetke uchrimighan hujummning jawabkarliqini daésh térrorluq teshkilati üstige alghanidi.

yene bir tereptin, türkiyedin dölitige béripla qollighuchiliri bilen körüshken dostum, kabuldiki pirézidént birinchi yardemchisi ishxansiida ötküzülgen kütüwélish murasimida söz qilip, türkiyede turghan jeryanda özige hemdem bolghan türkiye xelqi we dölitige minnetdarliq bildürdi.

birlik we barawerlikning ehmiyitini tekitligen dostum, héchkim bilen héchqandaq mesilisi yoqluqini, afghanistangha tinchliq élip kélish üchün, herqandaq pidakarliqni namayan qilishqa teyyar ikenlikini eskertti.

dostum, bir qanche kündin buyan qomandan nizamuddin qeyserining tutqun qilinishigha qarshi uda namayish qiliwatqanlargha xitab qilip, «namayishinglarni toxtitinglar, qeyserinimu qoyup bergüzimen, bu heqte pirézidént eshref ghéni bilen körüshimen» dédi.

abdurreshit dostum, térrorluq teshkilatlirigha qarshi küreshni qetiylik bilen dawamlashturidighanliqini sözlirige ilawe qildi.