боздағ: сәрраф делоси түркийәгә қарши қурулған тузақ
муавин баш министир вә һөкүмәт байанатчиси бәкир боздағ террорлуқ тәшкилатиниң сүрийәдики гумаштиси й п г ға америка тәрипидин берилгән қоралларниң қайтурувелиниши керәкликини ейтти.
түркийә авази радийоси хәвири: бәкир боздағ бир телевизийә қанилиниң зийаритини қобул қилғанда, түркийә җумһур рәиси рәҗәп таййип әрдоған билән америка пирезиденти доналд трампниң җүмә (24-нойабир) күнидики телефон сөһбитигә «бурулуш нуқтиси» дәп баһа бәрди. у түркийәниң пирезидент трампниң мәзкур тәшкилатқа буниңдин көп қорал бәрмәслик тоғрисида бәргән вәдисини көзитип туридиғанлиқини билдүрди. у мундақ деди:
«трампниң қорал бәрмәймиз, дегән сөзи интайин муһим, бирақ бу гәп еғизда қалса әһмийити болмайду, америка бәргән қоралларни қайтурувелиши керәк, дегән сөзни көзитип туримиз.»
у американи алдаш, иранға қарши йүргүзүлгән ембаргоға хилаплиқ қилиш, пул йуйуш, пул йуйуш үчүн тузақ қуруш вә америка банкилирини алдаш қатарлиқ җинайәтләр билән әйиблинип, 75 йил қамақ җазаси бериш тәләп қилинған әсли иранлиқ түркийә пуқраси риза сәрраф делоси үстидә тохталди. у: «риза сәрраф делоси түркийәгә қарши қурулған тузақтур, сәрраф арқилиқ түркийәгә тузақ қурулуватиду» деди.
у америкада сәррафни сотлиғанларға қаритип, мундақ деди:
«силәрниң қолуңларда риза сәррафниң җинайәтчи икәнликини көрситидиған тоғра испатлар барму, йоқ? болса силәргә у испатларни ким бәрди? қануни асаси болмиған бу дело тохтитилиши йаки ахирлаштурулуши керәк.»
у сөзини мундақ давамлаштурди:
«риза сәрраф америкаға кәттиму йаки апирилдиму? буму ениқ әмәс, <әгәр бизниң йазғинимизға имза қойсаң, түрмидин дәрһал чиқисән> дәватиду, әгәр қобул әтмисә 35 йил, 40 йил вә 150 йиллиқ охшимиған қамақ җазаси берилидиғанлиқи тоғрисида тәһдит селиниватиду.»
