emine erdoghan arakanliq musulmanlarni yoqlash üchün bangladishqa yétip bardi

türkiye awazi radiyosi xewiri: emine erdoghan, tereplerning diqqitini birmaning shimaliy raxayn ölkisidiki insaniy tiragédiyege jelp qilish we yüz bergen weqeler netijiside bangladishqa qéchishqa mejbur bolup qalghan arakanliq musulmanlargha yardem qilish jehette türkiyening qolidin kélishiche tirishchanliq körsitidighanliqini namayan qilish üchün, atatürk ayrodurumidin qozghalghan bir ayropilangha olturup yolgha chiqip, bangladishqa yétip bardi.

emine erdoghangha oghli bilal erdoghandin bashqa aile we ijtimaiy siyasetler ministiri fatma betül sayan qaya bilen adalet we tereqqiyat partiyesining kishilik hoquq ishlirigha mesul muawin bashliqi we istanbul parlamént ezasi rewze qawaqji kan, türkiye hemkarliq we kordinatsiye agéntliqi bashliqi serdar cham, bash ministirliq mehkimisi apet we jiddiy ehwallarni bir terep qilish bashqarmisi bashliqi mehmet güllüoghlu, qizil ay jemiy bashliqi ibrahim altan, türkiye yashlar we maaripqa xizmet qilish weqpi bashliqi arzu akalin we ayallar we démokratiye jemiyiti bashliqi sare aydin qatarliqlarmu hemrah boldi.

bangladishtiki arakanliq musulmanlar turuwatqan lagérlarni ziyaret qilidighan emine erdoghan we hemraliqidiki heyet, yüz bergen weqeler toghrisida arakanliq musulmanlardin biwasite uchur igileydu we türkiyening shekillendüridighan insaniy yardem köwrükining deslepki teyyarliqlirini tamamlaydu.

türkiye tashqi ishlar ministiri mewlut chawushoghlumu, birmaning arakan (raxayn) ölkisining shimalida meydangha kelgen weqeler yüzisidin bangladishqa qéchishqa mejbur bolup qalghan arakanliq musulmanlar (rohingyaliqlar) ning turmush sharaitini biwasite közdin kechürüsh üchün bangladishqa yétip keldi. u ziyariti dairiside paytext dakkada bangladishliq emeldarlar we xelqara xeyr – saxawet organlirining wekilliri bilen körüshidu.

birma chégrasidiki koksis bazar shehirige bérip, musapirlar turuwatqan lagérlarni ziyaret qilidu.