«gollandiyening tutqan pozitsiyesi diplomatiye tarixidiki eng nomus qilarliq ish»
aile we ijtimaiy siyasetler ministiri fatma betül sayankaya gollandiyening 11 – mart kéchisi tutqan insan qélipidin chiqqan pozitsiyesini «diplomatiye tarixidiki eng nomus qilarliq ish» dep atidi.
türkiye awazi radiyosi xewiri: ministir kaya déngizliq karxanichilar we soda - sanaetchiler munbiri teripidin ötküzülgen «soda – sanaet dunyasi kéngesh yighini» da qilghan sözide, ötken hepte gérmaniye we gollandiyediki türkler bilen bir yerge jem bolghanliqini, biraq gollandiyediki türkler bilen uchrishish meqsitide rottérdam shehiridiki türkiye konsulxanisigha bérishqa 30 métir qalghanda saqchilarning tosqunluqigha uchrighanliqini, shundaqtimu zorawanliqqa qetiy bash egmigenliklirini tekitlep mundaq dédi: «u kéchisi gollandiyening insan qélipidin chiqqan qilmishi, bizge qilghan muamilisi we tutqan pozitsiyesi diplomatiye tarixidiki eng nomus qilarliq ish hésablinidu. gollandiye saqchiliri méni chégradin qoghlap chiqarmaqchi boldi, konsul we meslihetchisini qolgha aldi. halbuki, bundaq weqe diplomatiye tarixida héch körülüp baqmighanidi. ayal ministir bolush süpitim bilen bundaq insan qélipidin chiqqan muamilini eyibleydighanliqimni bildürdüm. gollandiyening 8 – mart xelqara xanim - qizlar bayrimi künidin 3 kün kéyin yawropaning merkizide bizge bundaq muamile qilishi méni chongqur oygha salmaqta.»
tünügünmu niyu yorkta chaqirilghan birleshken döletler teshkilati ayallarning salahiyiti komitétining 61 – qétimliq yighinida gollandiyediki kechürmishliri heqqide doklat sunghanliqini eskertken kaya, doklatida pütkül dunyaning köz aldida insan qélipidin chiqqan muamilige uchrighanliqini, bashqa ellerning ayal ministirlirigha kechürmishlirini sözlep bergende hang – tang qalghanliqini we gollandiyeni qattiq eyibligenlikini tekitlep mundaq dédi: «rastini éytqanda, bu türkiyening qudret tépishini xalimighan gollandiyening bizge qilghan muamilisi idi.»
gollandiye hökümiti shenbe küni tashqi ishlar ministiri mewlüt chawushoghlu olturghan ayropilanning qonushigha ruxset qilmighan, aile we ijtimaiy siyasetler ministiri fatma betül sayankayaning türkiyening rottérdam konsulxanigha kirishige yol qoymighanidi.
