türkiye meblegh salghuchilargha puqraliq yolini achti

türkiye awazi radiyosi xewiri: resmiy gézitning bügünki (2017 – yili 12- yanwar) sanida élan qilinghan 2016/9601 – nomurluq höjjette körsitilishiche, türkiyege meblegh salghan, muqim mülük sétiwalghan, emgek küchi yaratqan, bankilargha pul yatquzghan yaki dölet qerzi sétiwalghan chet ellikler türkiye puqraliqigha öteleydiken.

yéngi belgilimide, 1) kem dégende 2 milyon amérika dolliri qimmitide turaqliq meblegh salghanliqi iqtisad ishliri ministirliqi teripidin ispatlanghan؛ 2) kem dégende 1 milyon amérika dolliri qimmitidiki muqim mülükni igidarchiliq xétige üch yil satmasliq izahatining yézilishi sherti bilen sétiwalghanliqi muhit asrash we sheher qurulushi ministirliqi teripidin ispatlanghan؛ 3) kem dégende 100 ademni ish – xizmet pursiti bilen teminligenliki emgek we ijtimaiy bixeterlik ishliri ministirliqi teripidin ispatlanghan؛ 4) kem dégende 3 milyon amérika dolliri qimmitidiki tashqi péréwotni üch yil ajratmasliq sherti bilen türkiyede paaliyet qiliwatqan bankilargha yatquzghanliqi bankichiliq kespini nazaret qilish – bashqurush orgini teripidin ispatlanghan؛ 5) kem dégende 3 milyon amérika dolliri qimmitidiki dölet qerzini üch yil tutup turush sherti bilen sétiwalghanliqi dölet xezine ishliri orgini teripidin ispatlanghan chet elliklerning ichki ishlar ministirliqining teklipi we ichki kabénitning qararigha asasen türkiye puqraliqigha öteleydighanliqi qeyt qilindi.

resmiy gézitte élan qilinghan mezkur höjjetning rohigha asaslanghanda, yuqirida bayan qilinghan besh shertning her qandaq birini hazirlighan chet ellikler türkiye jumhuriyiti puqraliqi qanunining 12 – maddisi birinchi bölümi (b) tarmiqi dairiside ichki ishlar ministirliqining teklipi we ichki kabénitning qarari bilen türkiye puqraliqigha öteleydiken.

belgilimide körsitilgen mebleghning qimmitini békitishte qimmetni békitken kündiki türkiye jumhuriyiti merkiziy bankisining tashqi péréwot sétish bahasi asas qilinidiken.