«türkiyege xas pirézidéntliq tüzümi türkiyening téz tereqqiy qilishigha purset yaritip béridu»
jumhur reis erdoghan türkiyege xas pirézidéntliq tüzümining türkiyening téz tereqqiy qilishigha purset yaritip béridighanliqini éytti.
türkiye awazi radiyosi xewiri: erdoghan qatarning «‹eljezire› téléwiziye qanili» ning ziyaritini qobul qilghanda bergen bayanatida, muhim söz qildi. jumhur reis «‹eljezire› téléwiziye qanili» da ikki qisim halitide tarqitilghan sözliride, türkiyediki birleshme hökümetler, adalet we tereqqiyat partiyesi öz aldighila hakimiyet béshigha chiqqan dewr, pirézidéntliq tüzümige alaqidar bes – munaziriler we 15 – iyul herbiy isyan urunushi qatarliq mesililer heqqide toxtaldi.
jumhur reis erdoghan amérika we rusiyening xizmet dairiliri oxshash bolmisimu emma pirézidéntliq tüzümini yolgha qoyuwatqan ülgilik ikki küch ikenlikini tekitlep mundaq dédi: «xizmet tüzülmiliri oxshash bolmasliqini bir chetke qayrip qoyayli. méning démekchi bolghinim mundaq: biz enenilirimizge asasen türkiyege xas pirézidéntliq tüzümini yolgha qoyayli. chünki bu tüzüm türkiyening téz tereqqiy qilishigha purset yaritip béridu.»
türkiyede birleshme hökümetler döletni bashqurghan mezgillerde muweppeqiyetke érishishning mumkin bolmighanliqini tekitligen erdoghan, özi bash ministirliq wezipisi ötigen dewrdin burunmu asasiy jehettin birleshme hökümetlerning hakimiyet béshida ikenlikini qeyt qildi.
erdoghan adalet we tereqqiyat partiyesining hakimiyet béshigha chiqishi bilen birlikte türkiyede birla partiye döletni bashquridighan dewrning bashlanghanliqini eskertken halda mundaq dédi: « 7 – iyun küni ötküzülgen saylamda birla partiye hakimiyet béshigha chiqalmighanliqy üchün, birleshme hökümet qurush üchün heriketke ötüldi, emma bu pilan ishqa ashmidi. shuning bilen, saylam tekrarlandi. netijide xelqning milliy iradisi birla partiyelik hakimiyet yolini achti.türkiye nöwette xelqaralik meblegh salghuchilarni eng köp jelp qiliwatqan bir dölet.»
